Այս տարի Լոնդոնը ճանաչվել է եվրոպական «շոպինգի» մայրաքաղաք: Քաղաքին այդ կարգավիճակը շնորհվել է Economist Intelligence Unit (EIU) կազմակերպության կողմից Եվրոպայի 33 երկրներում ըստ կատարված ուսումնասիրությունների :
Քաղաքները գնահատվում էին փորձագետների կողմից մի քանի չափանիշներով, մասնավորապես, տարաբնույթ խանութների եւ հոթելների առկայությամբ, դրանցում առաջարկվող ծառայությունների մակարդակով, առաջարկվող ապրանքների գնային մատչելիությամբ, տրանսպորտային համակարգով, մշակութային ժառանգության օբյեկտների քանակով, ինչպես նաեւ՝ եղանակային պայմաններով:
Պարզվեց, որ այս բոլոր պայմանները հաշվի առնելով, Լոնդոնը առաջ է անցել այնպիսի քաղաքներից, ինչպիսիք են Մադրիդը, Բարսելոնը, Փարիզն ու Հռոմը: 100 հնարավոր բալերից՝ չափանիշներից յուրաքանչյուրին համապատասխանելու առումով, բրիտանական մայրաքաղաքը 80,6 է ստացել: Ընդ որում, հետազոտողները նշել են, որ ընդհանուր առմամբ, եվրոպական քաղաքները շոպինգի համար ավելի նախընտրելի են, քան ասիականներն ու ամերիկյանները: Դրա մասին են վկայում մեկ այլ հետազոտության տվյալները, որոնք ցույց են տվել, որ զբոսաշրջիկների մեծ մասը, ում՝ արտասահման մեկնելու հիմնական նպատակը եղել է շոպինգը, գերադասել են մեկնել հատկապես եվրոպական երկրներ:
