Վերջին ժամանակներս մամուլում և սոցիալական ցանցերում նորից ակտիվացել են շահարկումները Չարենցի այսպես կոչված «գտնված» գերեզմանի առիթով: Մենք, Չարենցի ընտանիքը, մեր խորին վրդովմունքն ենք հայտնում ոչ մի փաստացի հիմք չունեցող այս հայտարարության առթիվ: Հիմք ընդունելով ընդամենը ինչ-որ մարդկանց հեքիաթները` չի կարելի պատմություն հորինել, այն էլ ողբերգական կյանք ապրած ու նահատակված հանճարի պատմություն:
Ես չգիտեմ, թե ինչ հերթական անհեթեթ թյուրիմացություն է այս մարդկանց գտած «գերեզման»-ը, միայն ասեմ, որ այն չի կարող «ստույգ» լինել մի պարզ պատճառով: Մեր ընտանիքից ոչ ոք ԴՆԹ նմուշ չի տվել, մեր, Չարենցի ժառանգների արյան հետ համեմատություն չի եղել, ուրեմն սա չհիմնավորված վարկած է:
Մենք ապրում ենք 21-րդ դարում և ոչ թե խուլ միջնադարում: Փաստեր են պետք: Մի շտապեք գերեզման փորել, եղածներն էլ շատ են: Եվ մի կեղծեք պատմությունը: Չարենցը գերեզման չունի, ստալինյան ռեժիմի, մի քանի տականք հայ չինովնիկների և իր որոշ «գրչակից» ընկերների պատճառով: Թող մեր սերունդները այդպես էլ իմանան: Այլապես կստացվի, որ մենք թուրքերի պես խմբագրում ենք մեր սեփական պատմությունը: Մինչև գիտական ստույգ հիմնավորում չլինի, մեր ընտանիքը չի կարող սա փաստ համարել:Մեր կյանքի ընթացքում մի քառասուն անգամ «գերեզման» են գտել: Տասնյակ տեղեր մատնանշել: Անգամ ասում են` Ռուսաստան են տարել բեռնատար գնացքով: Ասողը ՊԱԿ-ի հին կադր: Հետո….
Ես համոզված եմ, որ իմ ժողովուրդը իմաստուն կգտնվի և թույլ չի տա, որ Չարենցի հանդեպ մի նոր անարդարություն տեղի ունենա: Չարենցի իրական գերեզմանը իր հարազատ Ժողովրդի սրտում է, ուրեմն այնտեղ էլ թող մնա… կարևորը նրա հոգին է, որ ողջ է, քանի ապրում է նրա պաշտած հայ ժողովուրդը…
Անահիտ Չարենց
Հասմիկ Չարենց
Գոհար Բազյան Ջերահյան
