Սյունիքի մարզի ընդհանուր իրավասության դատարանը պաշտպանության նախարարության զորամասերից մեկի՝ 2-րդ վաշտի 3-րդ դասակի հրամանատար, լեյտենանտ Ստեփան Տեր-Նիկողոսյանին դատապարտել է 3 տարի 6 ամիս ազատազրկման:
Այս տարվա հունիսի 30-ին հրամանատարը դիտողություն էր արել շարքային Գրիգորի Բիլոգային՝ մարզահրապարակում վարժությունը սխալ կատարելու համար, նրան հրապարակային անվանել էր «ուղտ»: Չբավարարվելով հրապարակային վիրավորանք հասցնելուց, հրամանատարը բռունցքով հարվածել էր զինվորի ծնոտին, կոտրել այն: Դատաբժշկական եզրակացության համաձայն, զինվորը ստացել է «ստորին ծնոտի ձախ կեսի առանց տեղաշարժի կոտրվածք՝ առողջությանը միջին ծանրության վնաս՝ տեւական քայքայումով»:
Տեր-Նիկողոսյանը ցուցմունք էր տվել, թե երբ տեսել է՝ արյուն է գալիս, զինվորին տարել էր բուժկետ: Իսկ շարքայինն ասել էր, թե հաջորդ օրը տեսել է՝ դեմքը ուռել է, եւ դիմել է բուժկետ, որտեղ էլ իմացել է, որ ծնոտը կոտրվել է:
Հրամանատարի պաշտպան Վահե Արմենակյանը դիմելով ՀՀ քրեական եւ զինվորական գործերով վերաքննիչ դատարան՝ խնդրել է, որպեսզի պայմանական չկիրառվի ազատազրկումը:
Կարդացեք նաև
Ռուզան ՄԻՆԱՍՅԱՆ
