Առաջին ձյունը եկավ, իսկ մեր տրանսպորտը դեռ անմարդկային պայմաններում է կատարում ուղեւորափոխադրումներ: Մի շարք երթուղագծերի միկրոավտոբուսներ, մեղմ ասած, տեխնիկապես վատթարագույն վիճակում են: Այսօր «Փաստարկ» ակումբում տեղի ունեցած ասուլիսի ժամանակ «Սպառողների միության» նախագահ Արմեն Պողոսյանը կրկին անդրադարձավ հասարակական տրանսպորտի խնդիրներին: Ոլորտի խնդիրները թեթեւացնելու համար նա առաջարկում էր էլեկտրատրանսպորտի շահագործմանը զարկ տալ. «Ժամանակին մեր երկիրը ծախսել է 387 միլիոն կիլովատ էլեկտրաէներգիա էլեկտրատրանսպորտի շահագործման համար, իսկ հիմա ընդամենը 100 միլիոնի է ծախսում, այնինչ՝ տրամաբանությունը հուշում է, որ պետք է այդ թիվը կրկնապատկվեր»:
Ըստ նրա, էլեկտրատրանսպորտի շահագործումը ամեն տարի 4-5 %-ով նվազում է. «Պարզապես մենք եւս մեկ անգամ քաղաքային իշխանությանն ենք դիմում, որ ուշադրություն դարձվի էլեկտրատրանսպորտին եւ դրա զարգացմանը, որպեսզի մենք չշարունակենք երթեւեկել անմարդկային պայմաններում»:
Ըստ նրա, բնապահպանական, տնտեսական, սոցիալական եւ ամենակարեւոր՝ արժանապատվության առումով շատ ձեռնտու է էլեկտրատրանսպորտի զարգացումը. «Մետրոյի կանգառներն առնվազն 2-ով պետք է ավելացնել»: Aravot.am-ի հարցին, թե սպառողների պաշտպանն իրատեսակա՞ն է համարում, որ մետրոն շուտով կհասնի մինչեւ օդանավակայան, պարոն Պողոսյանը պատասխանեց. «Շատ կուզեի, որ իրատեսական լինի, բայց դա մեծ ծրագիր է եւ շատ ծախսատար: Չեմ կարծում, որ մոտ ժամանակում իրագործվի»:
Խոսելով միկրոավտոբուսներից, նա նշեց, որ դրանց նոր խմբաքանակները դեռ շարունակում են գալ, չնայած՝ դրանք պետք է փոխարինվեին ավտոբուսներով. «Շարքից դուրս եկողները պետք է դուրս գան եւ մարդավայել տրանսպորտ մտցնեն՝ մեծ ավտոբուսներ: Երեւան քաղաքի գլխավոր հատակագծում, որն ունի օրենքի ուժ՝ նշված է, որ միկրոավտոբուսների քանակն ընդհանուր տրանսպորտաշրջանառության մեջ պետք է լինի 19.2%: Վերջին 2-2.5 տարվա մեջ դրանց քանակը 90%-ից իջել է 75-80%: Այս տեմպով մենք Քրիստոսի 2-րդ գալստյան ժամանակ նոր կունենանք նորմալ տրանսպորտաշրջանառություն»:
Անուշ ԽԵՉՈՅԱՆ
