Էկոնոմիկայի նախարարության տվյալներով, դեղարտադրությունը Հայաստանում 2008-2011թթ. ժամանակահատվածում ավելացել է միջինը 7,1%-ով: Իսկ 2013 թվականից, կառավարության պահանջով, հայկական դեղագործական ձեռնարկություններում GMP ստանդարտների ներդրումը կբարձրացնի դրանց մրցունակությունը եւ կհանգեցնի դեղերի արտադրության ծավալների ավելացման ու տեղական դեղորայքի գների նվազման: Այս մասին «Արմինֆոյին» հայտնել է առողջապահության նախարարության դեղերի եւ բժշկական տեխնոլոգիաների փորձագիտական կենտրոնի տնօրեն Հակոբ Թոփչյանը: Ըստ նրա, հայկական դեղագործական արտադրությունը լիովին ապահովում է գնային եւ որակական բալանսը: Պատասխանելով այն հարցին, թե արդյոք Հայաստանում գոյություն ունի՞ պետական ֆարմակոպեա եւ քանի դեղամիջոց է դրանում գրանցված՝ Թոփչյանը հաղորդել է, որ Հայաստանը չունի պետական ֆարմակոպեա, քանի որ դրա ստեղծումը բավականին բարդ եւ թանկարժեք գործընթաց է: Հայաստանում դեղերի որակն ապահովվում է ամերիկյան, եվրոպական, բրիտանական եւ ռուսական ֆարմակոպեայի հիման վրա: Նրա խոսքերով, հայրենական դեղագործական արդյունաբերությունը հիմնականում ներկայացնում է 14 գրանցված ընկերություն: Դրանցից ամենախոշորներ են «Ֆարմատեքսը», «Արփիմեդը» եւ «Լիկվորը», որոնք արտադրում են հիմնականում հեղուկ դեղաձեւեր:
«Առավոտ» օրաթերթ
