Նոյեմբերի 2-ին՝ «Կապանում թափառող շներն ակտիվացել են», իսկ նոյեմբերի 11-ին «Կապանի թափառող շները մտել են շենքի 2-րդ հարկի բնակարան» հրապարակումներով տեղեկացրել ենք, որ թափառող շները դարձել են պատուհաս ու լուրջ վտանգ Սյունիքի մարզկենտոն Կապանի բնակիչների համար, պատկան կառույցները խոստանում ենն ոչնչացնել շներին, սակայն ոչինչ չեն անում:
Նոյեմբերի լույս 15-ի գիշերը Կապանում մեկնարկել է շների որսը, հնչել են կրակոցներ, սակայն բնակիչներին նախապես հայտարարվել էր, որ վախենալու կամ անհանգստանալու պատճառ չունեն՝ ոչնչացնում են թափառող շներին: Հարցի լուծման այլ տարբերակները պատասխանատուները ներկայումս համարում են անիրատեսական:
Նոյեմբերի 15-ի գիշերվա որսը տեւել է մոտ 2,5 ժամ 00:10-02:40: «Առաջին որսի արդյունքում 21 շուն է սպանվել, առավոտյան նույն տեղերում եղել են կոմունալ ծառայության աշխատակիցները, հավաքել են սատկած շների դիերը եւ տեղափոխել համայնքային աղբավայր ու թաղել: Հաջորդ որսը կլինի այսօր կեսգիշերին, այնուհետեւ 7-10 օր դադար կտանք, քանի որ կրակոցների ձայներից շները մի առ ժամանակ հեռանում են քաղաքից ու թաքնվում: Եթե անհրաժեշտություն լինի նման մի որս էլ կկազմակերպենք դեկտեմբերին», – «Առավոտի» հետ զրույցում ասաց Կապանի կոմունալ ծառայության տնօրեն Արմեն Գեւորգյանը:
Եթե փողոցներում թափառող շներից ազատվելու համար համայնքապետարանը ելք է գտել, ապա այդպես էլ որեւէ լուծում մինչեւ օրս չի գտնվել փողոցներում շրջող կովերի, ձիերի կամ էշերի համար: Սրանք անտեր ու թափառող կենդանիներ չեն, ընտանի են, սրանց պահում են Կապանի՝ գյուղական կոլորիտով թաղամասերի բնակիչները ու անասնատերերի մոտ կարծես սովորություն է դարձել իրենց անասուններին քաղաքի փողոցներում ու այգիներում արածեցնելը:
Կարդացեք նաև
ՄԵՐԻ ՍՈՂՈՄՈՆՅԱՆ
