Այսօր ժամը 11.30-ին Շենգավիթ վարչական շրջանի ընդհանուր իրավասության դատարանում սկսվեց լեյտենանտ Արտակ Նազարյանի սպանության գործով դատական նիստը: Նիստը նախագահում է դատավոր Սամվել Մարդանյանը:
Առայժմ միջնորդություն է արել ամբաստանյալ սպա Հակոբ Մանուկյանի պաշտպան Հրանտ Գեւորգյանը, որը հայտարարեց, թե նախաքննական մարմինը պատվեր է կատարել եւ իր պաշտպանյալին մեղսագրված արարքը չի համապատասխանում նկարագրությունը: Նա ոչ կոռեկտ արտահայտություններ եւ մեկնաբանություններ էլ արեց հանգուցյալի նկատմամբ: Հավանաբար դա էր պատճառը, որ միջնորդությունն ավարտելուց հետո նա դիմեց տուժողի իրավահաջորդին՝ Արտակի մորը, ասելով՝ եթե հնչել են բառեր, որոնք վիրավորում են ձեզ, ապա դա գործի նյութերից է:
Հայտարարվել է 15 րոպե ընդմիջում: Ա. Նազարյանի իրավահաջորդի ներկայացուցիչներ Սեդա Սաֆարյանը եւ Մուշեղ Շուշանյանը դեռ չեն ներկայացել նիստին, ներկա է 3-րդ ներկայացուցիչը՝ Ռուբեն Մարտիրոսյանը:
Դատական նիստը տեղի է ունենում ձայնամեկուսացված, ապակեպատ, լրագրողների նորմալ աշխատանքի համար հարմարեցված դահլիճում: Դահլիճում լարվածություն կա, որովհետեւ ներկա են սպանված զինվորների ծնողներ: Քիչ էր մնում բախում լիներ տուժողի իրավահաջորդների, հավաքվածների եւ Հակոբ Մանուկյանի հոր միջեւ, քանի որ նա հայտարարեց, թե Արտակը, իր իմացածով, կապ է ունեցել ադրբեջանցիների հետ:
Ռուզան ՄԻՆԱՍՅԱՆ
