Երևանի Կենտրոն-Նորք Մարաշ վարչական շրջանների Ընդհանուր իրավասության դատարանում արդեն 2 ժամ է, հայտարարված է ուժեղացված ծառայություն:
Ինչպես դատարանից aravot.am-ին հայտնում է ֆոտոլրագրող Գագիկ Շամշյանը, դատարան են ժամանել ՀՀ Վճռաբեկ դատարանի նախագահ Արման Մկրտումյանը, Քրեական պալատի նախագահ Դավիթ Ավետիսյանը, ովքեր նշված դատարանի նախագահ Ռուբեն Վարդազարյանի մասնակցությամբ, դատարանի աշխատակազմին են ներկայացնում նորանշանակ դատավոր Արշակ Վարդանյանին, ով, ըստ ֆոտոլրագրող Գագիկ Շամշյանի, Կենտրոն-Նորք Մարաշ վարչական շրջանների Ընդհանուր իրավասության դատարանի նախկին նախագահ Ժորա Վարդանյանի որդին է: Նա վերջերս է ՀՀ նախագահ Սերժ Սարգսյանի հրամանագրով նշանակվել նշված դատարանի դատավոր:
Գ. Շամշյանը հայտնեց, որ Արշակ Վարդանյանը նախկինում աշխատել է ՀՀ Գլխավոր դատախազությունում, այնուհետեւ` ՀՀ Հատուկ քննչական ծառայությունում:
Դատարանը վերցված էր ուժեղացված հսկողության տակ, և այն իրականացնում էին Կենտրոն-Նորք Մարաշ վարչական շրջանների Ընդհանուր իրավասության դատարանի դատական կարգադրիչների ստորաբաժանման մեծ թվով աշխատակիցներ, որոնց աշխատանքը ղեկավարում էր կարգադրիչների ստորաբաժանման պետ Արթուր Փիլոսյանը:
