Երեկ ԱԺ հայտարարությունների ժամին ՀՀ ԱԺ Հանրապետական խմբակցության պատգամավոր Հովհաննես Սահակյանի ելույթը նվիրված է եղել Թռչկանի ջրվեժին: Նա, մասնավորապես, ասել է. «Գուցե և մեզանից շատերի համար այդպես էլ աննկատ մնար Թռչկանն իր գեղատեսիլ բնությամբ, եթե չլիներ նրա շուրջ բարձրացված այս աղմուկը: Անշուշտ, մենք նույնպես խրախուսում և կարևորում ենք վերականգնվող այլընտրանքային էներգիաի արտադրությունը, որը մեզ համար ռազմավարական նշանակություն ունի տարածաշրջանում: Սակայն անթույլատրելի է նման գործունեությունը բնության այնպիսի հուշարձանների հաշվին, ինչպիսին է Թռչկանը: Այս խնդիրը արժանի է մեր յուրաքանչյուրիս ուշադրությանը: Գուցե Լոռու և Շիրակի մարզերի սահմանում գտնվող Թռչկանի ձայնը այնքան բարձր չէ, որպեսզի աղաղակի իրեն սպառնացող վտանգի մասին, սակայն թե մեր հասարակության մտահոգ մաս կազմող երիտասարդությունը, թե տարածաշրջանի ազգաբնակչությունը ի զորու եղան պաշտպանելու Թռչկանը: Ես ցանկանում եմ շնորհակալություն հայտնել բոլոր նրանց, ովքեր ոչ միայն լավ գիտեն Հայաստանի հրաշալիքների մասին, այլև տեղյակ են այդ եզակի նմուշների խնդիրներին, մշտապես բարձրաձայնում են ու կարող են ցանկացած պահի կանխել ամեն մի ոտնձգություն: Ես նաև ցանկանում եմ Սպիտակի տարածաշրջանի ազգաբնակչության և անձամբ իմ անունից երախտիքի խոսք հայտնել հանրապետության նախագահին` Թռչկանը, որպես բնության թանգարանային նմուշ դիտարկելու և հետագայում Թռչկանի անվտանգ թռիչքը երաշխավորելու համար»:
