Այսօր Երեւանում կայացած Ճարտարապետների եւ շինարար-ճարտարագետների համահայկական ընկերակցության խորհրդի ընդլայնված նիստում հրաժարական տվեց խորհրդի նախագահ, Երեւանի գլխավոր ճարտարապետ Նարեկ Սարգսյանը: Հրաժարականն անակնկալ չէր միայն ՀՀ սփյուռքի նախարար Հրանուշ Հակոբյանի համար, որին, ինչպես նախարարն ինքը հայտարարեց՝ արդեն տեւական ժամանակ է, ինչ Նարեկ Սարգսյանը խնդրում եւ առաջարկում է ընդունել իր խնդրանքը: «Պետք չէ ինձ հարգել, իմ խնդրանքը հարգեք»,- լուրջ դեմքով հայտարարեց Նարեկ Սարգսյանը: Ճարտարապետների եւ շինարար-ճարտարագետների համահայկական ընկերակցության խորհուրդը հարգեց խնդրանքը:
Այսուհետ Ճարտարապետների եւ շինարար-ճարտարագետների համահայկական ընկերակցությունը կունենա համանախագահներ՝ մեկը սփյուռքից, մյուսը՝ Հայաստանից: Այսօր որոշվեց, որ սփյուռքից կազմակերպության աշխատանքները կհամակարգեն Քաթարում ապրող Վահե Թութունջյանն ու նրա կինը, իսկ Հայաստանից Ճարտարապետության ազգային թանգարան-ինստիտուտի տնօրեն Աշոտ Գրիգորյանը:
Նարեկ Սարգսյանի հրաժարականը անակնկալ էր նաեւ այն իմաստով, որ Նարեկ Սարգսյանի հասցեին չհնչեց քննադատական ոչ մի խոսք: Ավելին՝ ներկա ճարտարապետների մեծ մասը գովերգեց նրան: Միակ քննադատությունը լսվեց հենց Նարեկ Սարգսյանի շուրթերից: 2009 թվականին ստեղծված Ճարտարապետների եւ շինարար-ճարտարագետների համահայկական ընկերակցության նախագահն ասաց, որ դեռ վստահություն չկա սփյուռքահայ եւ տեղացի ճարտարապետների միջեւ: Նարեկ Սարգսյանն ասաց, որ վստահություն հաստատելու համար երկար տարիներ ու մեծ ջանքեր են պետք:
Իսկ թե որքանով է Նարեկ Սարգսյանը ջանում, որ վստահություն լինի՝ կարդացեք վաղվա «Առավոտում»:
Կարդացեք նաև
Արամ ԶԱՔԱՐՅԱՆ
