ՀՀԿ պատգամավոր Գագիկ Մելիքյանն այսօր «Հենարան» ակումբում լրագրողների խնդրանքով մեկնաբանեց վերջերս ՕԵԿ խմբակցության պատգամավոր Հովհաննես Մարգարյանի Գյումրիում արած այն հայտարարությունը, թե իրենց կուսակցությունում չկան «արյունոտված մարդիկ», «խուժաններ ու գողեր»: Հիշեցնենք, որ օրերս ԲՀԿ պատգամավոր Վարդան Բոստանջյանն իր գործընկերոջ այդ հայտարարության մասին ասել էր. «Հաճախ մարդիկ խոսքի ընթացքում ընկնում են էյֆորիայի կամ էքստազի մեջ»:
Գ. Մելիքյանը չցանկացավ որեւէ մեկնաբանություն անել Հովհաննես Մարգարյանի ասածի վերաբերյալ: Միայն նշեց, որ խնդիրն ավելի շուտ նեղ անձնական, քան քաղաքական բնույթ ունի. «Անձնական բնույթի մեկնաբանությունները չեմ ցանկանում մեկնաբանել, որովհետեւ դրանք ինձ համար էլ տհաճ են»:
Խոսելով ներքաղաքական ներկայիս վիճակից՝ հանրապետական պատգամավորը ասաց, որ առաջիկայում ընդդիմադիր դաշտում խոշոր փոփոխություններ չի ակնկալում. «Կարծես թե ընդդիմադիր դաշտն արդեն ձեւավորված է: Իրենք ցանկանում են համախմբվել՝ մեկ ուժով ներկայանալ՝ նաեւ ընդդիմադիր դաշտի հաղթանակը ապահովելու առումով, բայց, կարծում եմ, որ դա դժվար իրականացվող խնդիր է իրենց համար, քանի որ գաղափարական տարաձայնությունները բավականին մեծ են»:
Լուսինե ԽԱՉԱՏՐՅԱՆ
