Թիվ 61205010 քրեական գործն այս տարվա օգոստոսի 18-ից գտնվում է Էրեբունի եւ Նուբարաշեն վարչական շրջանների ընդհանուր իրավասության դատարանում:
Քրեական գործը հարուցվել է Գառնիկ Սարգսյանի դեմ: Ըստ մեղադրական եզրակացության, նա հանդիսացել է ՀՀ ՊԵԿ Էրեբունու տարածքային հարկային տեսչությունում հաշվառված «Մոնդիկո» ՍՊ ընկերության տնօրեն: Մեր տեղեկությունների համաձայն, Գ.Սարգսյանը ընկերության տնտեսական գործունեության վերաբերյալ հաշվետվություններ չներկայացնելու, իսկ ներկայացվածներում ակնհայտ խեղաթյուրված տվյալներ մտցնելու միջոցով խուսափել է առանձնապես խոշոր չափերի՝ 54517200 դրամի հարկեր վճարելուց: Նա մեղադրվում է նաեւ, որ «սեփական շահերից ելնելով կանխամտածված անվճարունակության հատկանիշներ ստեղծելու» միջոցով, պետությանը պատճառել է 205855000 դրամի խոշոր վնաս:
Այսքանով հանդերձ, 41-ամյա տնօրենի նկատմամբ ընտրվել է խափանման միջոց՝ ստորագրություն չհեռանալու մասին:
Ի դեպ, Արաբկիր եւ Քանաքեռ-Զեյթուն համայնքի ընդհանուր իրավասության դատարանում շարունակվող «Հայինկասացիայի» գործով տասնապատիկ պակաս գումար յուրացնելու համար կասկածվող տարեց կանանց՝ գանձապահի եւ հաշվապահի նկատմամբ ընտրվել է կալանքը:
Ռուզան ՄԻՆԱՍՅԱՆ
