Այսօր ժ.10-ին Լոռու մարզի ընդհանուր իրավասության դատարանում, դատավոր Վարդուհի Հովնանյանի նախագահությամբ, շարունակվեց Լեռնապատի գյուղապետ Վանո Եղիազարյանն ընդդեմ գյուղաբնակ Բորիս Աշրաֆյանի հայցի քննության նախնական նիստը:
Հիշեցնենք, որ իր պատիվը, արժանապատվությունը եւ գործարար համբավն արատավորելու համար հայցվորը փոխհատուցում էր պահանջել պատասխանողից: Այս գործով 3-րդ անձ է ճանաչվել նաեւ «Առավոտը»:
Նախորդ դատական նիստն ավարտվել էր պատասխանող Բորիս Աշրաֆյանի՝ դատավորին ինքնաբացարկ հայտնելու միջնորդությամբ: Դատարանը մերժեց կրկնակի ինքնաբացարկը: Պատասխանողը հանդես եկավ մի նոր միջնորդությամբ՝ հետաձգել հայցի քննությունը, քանի որ ՀՀ սահմանադրական դատարանում նոյեմբերի 15-ին քննության է դրվելու քաղաքացիական օրենսգրքի «վիրավորանք եւ զրպարտություն» հոդվածների սահմանադրականության հարցը: Սակայն այս միջնորդությունը դատարանը չհասցրեց քննել, քանի որ հայցվոր գյուղապետը հանդես եկավ հայցադիմումի լրացմամբ: Դատավորը նախնական նիստը հետաձգեց մինչեւ հաջորդ տարվա հունվարի 13-ը:
Ելնելով «Առավոտի» մարտավարությունից՝ զերծ ենք մնում նոր հայցադիմումի բովանդակությունը հրապարակելուց: Միայն հավելենք, որ գյուղապետը չսպասելով ՀՀ Սահմանադրական դատարանի դիրքորոշմանը, ներկայացրել է Քաղաքացիական օրենսգրքի վիճարկվող հոդվածների հիմքերով նոր պահանջներ:
Կարդացեք նաև
Իսկ տարբերությունը նախորդ հայցադիմումից այն է, որ տրամադրել է նաեւ պատրաստի հերքման տեքստ.« Գյուղապետը չի յուրացրել», «Գյուղապետը չի նշանակել», «Գյուղապետը չի շարունակում յուրացնել», «Գյուղապետը ոչ ոքու օգնություն չի հատկացրել, քանի որ գյուղապետը օգնություն հատկացնող չէ» բառակապակցություններով:
Ռուզան ՄԻՆԱՍՅԱՆ
