Եկող տարվանից գնումների մասին հայտարարություններն ու գնումների ողջ գործընթացը իրականանալու է բաց մրցույթով ու էլեկտրոնային համակարգով: Այսօր ֆինանսների նախարարությունում կազմակերպված ասուլիսում նոր համակարգը ներկայացնելով՝ ՀՀ ֆինանսների նախարար Վաչե Գաբրիելյանն ասաց, որ յուրաքանչյուր անձ կարող է տեսնել Հայաստանում ով ումից ինչ է գնում: Ըստ նրա, այս համակարգի ներդրումը կնվազեցնի թղթատարությունը եւ կոռուպցիան:
Պարոն Գաբրիելյանի խոսքերով. «Օրինակ՝ ով հետաքրքրված է, թե ֆինանսների նախարարությունը ումից է բենզին, թուղթ գնում, կարող է տեսնել գնումների պետական էլեկտրոնային համակարգում»: Խոսքը, սակայն, չի վերաբերում պետության անվտանգությանը վերաբերող հարցերին: Հետաքրքրասերները հաստատ չեն կարողանա պարզել, թե, օրինակ, պաշտպանության նախարարությունը ումից է տանկ կամ զենք-զինամթերք գնում: «Կան սահմանափակումներ, մեր երկրի անվտանգությանը վերաբերող հարցերը չենք բացելու»,- հայտնեց նախարարը: Նրա խոսքերով, նոր համակարգը ենթադրում է, որ նախարարություններին մի շարք ապրանքներ սպասարկող ընկերությունները կփոխվեն: Նախարարի տվյալներով, նախորդ տարի 450 միլիարդ դրամի պետգնումներ են կատարվել:
Արփինե ՍԻՄՈՆՅԱՆ
