Հայոց Ցեղասպանության մասին ՀՀ-ում Մեծ Բրիտանիայի եւ Հյուսիսային Իռլանդիայի Միացյալ Թագավորության արտակարգ եւ լիազոր դեսպան Չարլզ Լոնսդեյլն այսօր ՄԱԱ-ում ասուլիսում զգոնությամբ էր խոսում. «Պաշտոնական դիրքորոշումը չեմ կարծում՝ կփոխվի: Դեսպանների աշխատանքն այս հարցում առաջընթաց չի կարող ունենալ, որոշողը մեր կառավարությունն է: Ես գիտեմ, թե հարցը որքան ցավալի է յուրաքանչյուր հայի համար: Մենք հարգում ենք զոհերի հիշատակը: Հայերի տեղահանությունները ժամանակին Բրիտանիայի կառավարության կողմից դատապարտվել են»:
Դեսպանն ասում է, որ Թուրքիայի ու Հայաստանի կառավարությունները պետք է վերանայեն դիվանագիտական հարաբերությունները: Իսկ մեր տարածաշրջանին վերաբերող խնդիրների մասին դեսպանն ասում է. «Իհարկե, մեր առաջնահերթությունը հակամարտությունների կանխումն է, ու նպատակն այն է, որ տարածաշրջանում խաղաղություն տիրի: Մենք կենտրոնանում ենք հասարակության միջեւ հարաբերությունների վրա, որոնք կտանեն դեպի դիվանագիտություն»:
Չարլզ Լոնսդեյլը նշում է, որ իրենք մեծապես հետաքրքրված են ժողովրդավարական խնդիրներով: «Հետաքրքրված ենք առեւտրային կապերով, սերտ հարաբերություններ ենք հաստատում ԵՄ-ի հետ, մեր օրակարգում են նաեւ պաշտպանության ոլորտի խնդիրները»:
«Ասեմ, որ Հայաստանից Մեծ Բրիտանիայի այցելությունների 10 տոկոս աճ է արձանագրվել: Հիմնական ոլորտներն են՝ կրթությունն ու բիզնեսը»,-նշում է դեսպանը:
Կարդացեք նաև
Նա հայտնեց, որ ուրախ կլինի ավելի շատ հայերի տեսնել Անգլիայում, չնայած վիզային ռեժիմը առայժմ չի պարզեցվի:
Միքայել ԱՀԱՐՈՆՅԱՆ
