Հայ-ռուսական մշակութային եւ «Հայաստանում ռուսական մշակույթի սեզոններ» ծրագրի շրջանակներում նոյեմբերի 12-16-ը Հայաստանում է թատրոնի եւ կինոյի անվանի դերասան, Ռուսաստանի Դաշնության ժողովրդական արտիստ Վենիամին Սմեխովը: Նա մեր երկիր է ժամանել տիկնոջ` արվեստագիտության թեկնածու, Ա. Չեխովի անվան Մոսկվայի գեղարվեստական թատրոնի` MXT-ի դպրոց-ստուդիայի դոցենտ, թատերական քննադատ Գալինա Աքսիոնովայի հետ: Այս այցը ժողովրդական արտիստի երրորդ մշակութային գործուղումն է Հայաստան:
Վաղը երեկոյան Կ. Ստանիսլավսկու անվան ռուսական պետական դրամատիկական թատրոնում տեղի կունենա Վենիամին Սմեխովի ստեղծագործական երեկոն:
Ռուսաստանից ժամանած արտիստներն այս օրերին հանդիպում կունենան նաեւ Երեւանի կինոյի եւ թատրոնի պետական ինստիտուտի ուսանողության եւ դասախոսության կազմի հետ, հանդես կգան վարպետության դասերով:
Վենիամին Սմեխովը նկարահանվել է ավելի քան 25 ֆիլմերում, թատրոնում կերպավորել է 5 տասնյակից ավելի դերեր, Ռուսաստանում եւ արտերկրում հայտնի է որպես դրամատիկական եւ օպերային ներկայացումների բեմադրիչ: Ներկայումս ԱՄՆ համալսարաններում դասավանդում է դերասանի վարպետություն, ստեղծագործում չափածո եւ արձակ:
Այժմ Վենիամին Սմեխովը եւ Գալինա Աքսիոնովան Մշակույթի նախարարությունում ասուլիս են տալիս:
Հանդիպման տեսանյութը` շուտով:
Լուսինե ԽԱՉԱՏՐՅԱՆ
