Հայաստանի անկախության 20-ամյակի կապակցությամբ Մամուլի ազգային ակումբում հավատարմագրված օտարերկրյա դեսպանների հանդիպումների շարքում այսօր հյուրընկալվեց ՀՀ-ում Մեծ Բրիտանիայի եւ Հյուսիսային Իռլանդիայի Միացյալ Թագավորության արտակարգ եւ լիազոր դեսպան Չարլզ Լոնդսեյլը: Նա չորս տարի է, ինչ պաշտոնավարում է մեր երկրում: «Ասեմ, որ դժվար չորս տարիներ էին: Չեմ ասում շա~տ դժվար տարիներ, բայց դժվարություններ, անշուշտ, եղել են: Եթե անդրադառնանք անկախության շեմին արված փոփոխություններին, պետք է ասեմ, որ դեռ շարունակվում են բանակցային գործընթացները երկու կարեւոր՝ հայ-թուրքական ու Ղարաբաղի անկախացման հարցերում»,-նշում է դեսպանը:
Դեսպանն անդրադարձավ նաեւ գլոբալ տնտեսական ճգնաժամին, որ բախել է գրեթե բոլոր երկրների դռները: «Մենք մեծապես նպաստել ենք հաջող համագործակցությանը Հայաստանում, կարծում եմ՝ այսօրինակ հարաբերությունները հիմք են ստեղծում հետագա բարեփոխումների ու զարգացման համար»,-հավելեց դեսպանը:
Հարցին՝ ի՞նչ տպավորություններով է հեռանում Հայաստանից, դեսպանն առանձնակի ժպիտով պատասխանեց. «Շատերն են շտապում հարցնել, թե ի՞նչ հուշերով եմ կապված Հայաստանի հետ: Կինս գեղեցիկ հայուհի է: Նա ամենակարեւոր նվերն է ինձ համար: Ասեմ, որ ձեր երկիրը ինձ շատ է դուր եկել: Կշարունակեմ մնալ զբոսաշրջության ջատագով»,-եզրափակեց դեսպանը:
Միքայել ԱՀԱՐՈՆՅԱՆ
