Երեկ երեկոյան Youtube-ում հայտնված տեսահոլովակի առնչությամբ վարչապետ Տիգրան Սարգսյանն արձագանքել է իր բլոգում եւ «Ֆեյսբուքի» իր էջում: Հիշեցնենք, որ խոսքը նոյեմբերի 10-ին՝ Երիտասարդության օրվա առիթով մարզահամերգային համալիրում տեղի ունեցած Թաթա Սիմոնյանի համերգի եւ վարչապետի՝ ոչ հարիր խոսքին էր վերաբերում. «Ֆեյսբուքում» բուռն քննարկում էր, թե վարչապետը հարբել է:
«Ես հասկացել եմ, որ ձեզնից շատերին զվարճացրել է ձայնային խոտանով տեսահոլովակը, որը նկարահանվել և տարածվել էր Հ1-ի կողմից` մարզահամերգային համալիրից: Եվ այդ ձայնային խոտանն այսօր փորձում են ներկայացնել իբր իմ հարբած լինելու ապացույց: Ես նույնպես դիտել եմ այդ հոլովակը և, անկեղծ ասած, այն ինձ ևս զվարճացրեց»,- գրել է Տիգրան Սարգսյանն իր բլոգում:
Նշենք, որ համացանցում տարածվել էր ոչ թե Հ1-ի, այլ «Արմենիա» հեռուստաընկերության «Ժամը» լրատվականի տեսանյութը: Կարճ ժամանակ անց այդ տեսանյութը հեռացվել էր հեռուստաընկերության՝ Youtube-ի account-ից: Aravot.am-ը կապվեց այդ տեսանյութի հեղինակ Թամարա Գուրգենյանի հետ՝ պարզելու համար, թե իր պատրաստած ռեպորտաժում ձայնային խոտան կա՞, թե՞ ոչ: Վերջինս նախ խնդրեց 10 րոպեից զանգահարել, որպեսզի որոշի՝ պատասխանե՞լ, թե՞ ոչ: Ավելի ուշ լրագրողը մեզ հայտնեց, որ հարցի առնչությամբ ինքը մեկնաբանություններով հանդես չի գա:
Լուսինե ԽԱՉԱՏՐՅԱՆ
