Մեծանուն բանաստեղծ Համո Սահյանի եւ տաղանդաշատ բանաստեղծուհի Մարիա Հակոբյանի որդին՝ Նաիրի Սահյանը օրերս տպագրեց 
իր անդրանիկ «Եղրեւանագույն պատրանք» բանաստեղծությունների գիրքը: Նաիրին, ինչպես «Առավոտին» վերջերս տված հարցազրույցի ժամանակ էր տեղեկացրել, 7 տարվա ամերիկյան դեգերումներից հետո վերադարձել է հայրենիք: Բանաստեղծությունները, որոնք 17-ն են, հիմնականում գրվել են Լոս-Անջելեսում: Դրանք ծնվել են մանկության եւ հայրենիքի կարոտից:
Նաիրիի բանաստեղծությունները աղերս չունեն ծնողների զգացողությունների եւ ոճի հետ: Դրանք, ինչպես բանասիրական գիտությունների դոկտոր Շչորս Դավթյանն է գրքի առաջաբանում գրում. «ինքնեկության արգասիք» են, բնական, ինչպես Տիեզերքի զարկերակը ափերում պահած հեղինակը:
Ոստիկանությունում 7 տարի քննիչ աշխատած, մասնագիտությամբ իրավաբան Սահյանը գրում է. «Ես պիտի ճախրեմ այն աշխարհներում, Որտեղ Աստծով է լցված ամեն ինչ, բայց չկա ոչինչ: Եվ այդ ճախրանքում անսահման, անվերջ, Ազատությունս կգտնեմ հանկարծ, ամեն ինչից դուրս, ամեն ինչի մեջ»:
Ռ. Մ.
Կարդացեք նաև
«Առավոտ» օրաթերթ
