Մեծի Տանն Կիլիկիո կաթողիկոս Արամ 1-ինը նամակով ողջունել է Միացյալ Նահանգների պետքարտուղար Հիլարի Քլինթոնի` Թուրքիայում կրոնական համանքների բռնագրավված գույքը վերադարձնելու կոչը:
Բարձր գնահատելով Քլինթոնի այդ հայտարարությունը` Արամ Առաջինը միաժամանակ օգնություն է առաջարկել «այդ գույքի վերադարձը ապահովելու համար»: Այս մասին հայտնում է Ամերիկայի Հայ դատի գրասենյակը:
Հիշեցնենք, որ Հիլարի Քլինթոնը, ի պատասխան Ամերիկայի Հայ դատի գրասենյակի նամակին, այս տարվա հոկտեմբերին գրավոր տեղեկացրել էր, որ Միացյալ Նահանգների կառավարությունը ակտիվորեն ճնշում է գործադրում Թուրքիայի կառավարության բարձրագույն օղակների նկատմամբ` այդ երկրի կրոնական համայնքների բռնագրավված ունեցվածքը վերադարձնելու հարցով։
Նոյեմբերի 5-ին ուղարկված նամակում Արամ Առաջինը գրում է. «Մենք ջերմորեն ողջունում ենք այս խիզախ նախաձեռնությունը: Կիլիկիո թեմը, որ բռնությամբ արմատախիլ է արվել դարեր շարունակ իրեն պատկանող նստավայրից, շարունակում է մնալ ներկայիս Թուրքիայի տարածքում գտնվող բազմաթիվ եկեղեցիների, վանքերի, հիվանդանոցների, ծերանոցների, դպրոցների, որբանոցների, հուշարձանների, գերեզմանների եւ կրոնական այլ վայրերի և սեփականությունների օրինական սեփականատերը եւ հոգեւոր պահապանը»:
Կարդացեք նաև
«Այս գույքը, ինչպես նաեւ անհամար շարժական այլ ակտիվներ, այդ թվում` հոգեւոր եւ մշակությային գանձեր, Օսմանյան Թուրքիան ապօրինաբար խլել է հայկական եղեկեցուց` սկսած 1890- ականներից մինչ Հայոց ցեղասպանությունը (1918 թվականը)», – գրում է Արամ Առաջինը:
«Ազատություն» ռ/կ
