Այսօր «Ազդակ» ակումբում կայացած ասուլիսի ժամանակ լրագրողները ԲՀԿ խմբակցության անդամ Վարդան Բոստանջյանից հետաքրքվեցին, թե ի՞նչ նմանություններ է տեսնում ՕԵԿ-ի եւ ԲՀԿ-ի միջեւ եւ առաջիկայում հնարավոր համարու՞մ է, որ ՀՀ մշակույթի նախկին նախարար Թամար Պողոսյանի պես՝ այլ ՕԵԿ-ականներ էլ ԲՀԿ-ական դառնան. «Նմանություններին ծանոթ չեմ կարող լինել, միգուցե մշակույթից հեռու մարդ եմ, բայց բոլոր պարագաներում՝ մի բան կարող եմ հստակ ասել, որ մեզ մոտ գոյություն ունի մոտեցումը, որ մարդկանց բաժանում ենք բանակների՝ յուրայիններ, ոչ յուրայիններ, օտարներ»,- պատասխանեց ԲՀԿ-ական պատգամավորը: Ավելի ուշ կարծիք հայտնեց, թե անկախ նրանից՝ մարդը ո՞ր ուժի կամ ի՞նչ հասարակական կազմակերպության մեջ է գտնվում, պետք է իրեն դրսեւորի. «Թամար Պողոսյանն այդպիսի անձնավորություն է»:
Պարոն Բոստանջյանը քաղաքական ուժերից նկատի ուներ նաեւ Կոնգրեսին. «Ինչի՞ չէ, ախր մենք օտարներ չենք: Էդ նույն Կոնգրեսը խելոք մարդկանց հավաքատեղի է եղել միշտ, մեր երկիրն իրենք ստեղծեցին, էս ազատ հարաբերությունները: Բոլոր դեպքերում իրենց ընդդիմադիր կեցվածքն էլի կառուցողական բնույթ է կրում: Ուզում եմ էդպես մտածել, որ այսօրվա իշխանությունները բազմաթիվ քայլեր՝ ի նպաստ ժողովրդի, անում են՝ ելնելով ՀԱԿ-ի խոսքերից կամ մոտեցումներից»:
Լուսինե ԽԱՉԱՏՐՅԱՆ
Կարդացեք նաև
