Արդեն հաղորդել ենք , որ երեկ երեկոյան հանրապետության նորանշանակ ոստիկանապետ Վլադիմիր Գասպարյանի հրամանով աշխատանքից ազատվել է Շիրակի մարզի ոստիկանապետ Արամ Տեր-Թովմասյանը` իր աթոռը զիջելով ՀՀ ոստիկանության կազմակերպված հանցագործության դեմ պայքարի գլխավոր վարչության պետի տեղակալ Կարեն Բաբակեխյանին: Ինչպես տեղեկացնում են ոստիկանական մեր աղբյուրները, պետի հեռանալն անակնկալ է եղել անձնակազմի համար. վերջինս, իմանալով իրեն ազատելու լուրը, հավաքել է իրերն ու առանց հրաժեշտի հեռացել, իսկ անձնակազմին պաշտոնապես այս մասին տեղյակ են պահել ուշ երեկոյան: Նշենք, որ առայժմ պաշտոնազուրկ ոստիկանին որեւէ պաշտոն չեն խոստացել:
Ի դեպ, Շիրակի նախկին մարզային ոստիկանապետը մայրաքաղաքից էր, այս պաշտոնը զբաղեցնում էր մոտ 2,5 տարի, եկել էր Գյումրու հանրահայտ պաշտոնյաների §ռազբորկասեր¦, կրմինալ հակում ունեցող տղերքին կարգի հրավիրելու ու, այսպես ասած, անկաշկանդ աշխատելու համար, այսինքն՝ ոստիկանական համակարգում ծանոթախնամիական կապերի օգնությամբ հանցագործներին պատժից ազատելուն վերջ դնելու: Համենայնդեպս իր պաշտոնավարման 2,5 տարիների ընթացքում հրավիրած միակ մամուլի ասուլիսի ժամանակ նման մի խոստովանանք հնչել է ոստիկանապետի շուրթերից:
Այս ոստիկանապետի օրոք թեեւ արտառոց «ռազբորկաներ» տեղի չունեցան մինչ այդ կրիմինալ քաղաքի համբավ ձեռք բերած Գյումրիում, այդուհանդերձ քաղաքն աչքի ընկավ բենզին սրսկվողների աննախադեպ քանակով: Ոստիկանապետին չհաջողվեց նաեւ լռեցնել վրացական պետհամարանիշով մեքենաների վարորդների բողոքի ալիքը: Ինչպես կատակում են գյումրեցի որոշ պաշտոնյաներ, Շիրակի մարզին երկրորդ ոստիկանապետ անհրաժեշտ չէ, քանի որ Շիրակի մարզպետ Աշոտ Գիզիրյանը, որը նախկինում զբաղեցրել է ոստիկանապետի պաշտոնը՝ իր հին մասնագիտությունը այդպես էլ չի կարողանում մոռանալ. վերջինս նույնիսկ լրագրողների ներկայությամբ մի քանի անգամ հրահանգներ իջեցրեց մարզի ոստիկանապետերին: Նկատենք, որ մարզի պաշտոնյաներից շատերի տպավորությամբ, ոչ թե ոստիկանապետին, այլ մարզպետին է հաջողվել վերջ դնել քաղաքի բարձրաստիճան պաշտոնյաների որդիների կողմից օրը ցերեկով հաճախակի արձակվող կրակոցներին:
Ի դեպ, մեր աղբյուների փոխանցմամբ, Շիրակի նորանշանակ ոստիկանապետը, ինչպես եւ նախորդը, եղել է Աշոտ Գիզիրյանի ենթական ու նրա պատրաստած կադրը:
Կարդացեք նաև
Նունե ԱՐԵՎՇԱՏՅԱՆ
