Երեկ Հայաստանի արդյունաբերողների եւ գործարարների միության համագումարի ժամանակ նախագահ Սերժ Սարգսյանի ելույթը խուճապի է մատնել բոլոր նրանց, ովքեր շարունակում էին առաջիկա խորհրդարանում պատգամավորական մանդատ ստանալու հույսեր փայփայել։ «Այո, մենք կանգնած ենք նոր սկզբի առջեւ։ Գործարարությունը պետք է հետեւողականորեն տարանջատվի պետական համակարգից եւ իշխանությունից»,- երեկ հայտարարել է Սերժ Սարգսյանը։ Այն գործարարները, ովքեր այսօր պատգամավորական մանդատ ունեն եւ դեմ չեն շարունակելու իրենց օրենսդրական գործունեությունը, մտավախություն ունեն որ Սարգսյանը փորձում է դրանով իրենց հասկացնել, որ պատգամավոր դառնալու հույսեր չունենան։ Բայց եթե նախագահն իսկապես հետեւողական է լինելու իր հայտարարությանը, ապա մտավախության հիմք պետք է ունենան ոչ միայն պատգամավորները։ Հայաստանում դժվար է գտնել պետական մի պաշտոնյա՝ բարձրաստիճան կամ նույնիսկ ոչ այնքան, որը սեփական բիզնես (ներ) չունենա՝ սկսած նախարարությունների ու գերատեսչությունների աշխատակիցներից, վերջացրած ոստիկանապետներով, դատախազներով եւ մյուսներով։
«Հրապարակ»
