Այսօր Տավուշի մարզային փրկարարական վարչության պետ Վաղինակ Հովսեփյանը, Տավուշի մարզպետարանի տարածքային կառավարման վարչության պետ Միշա Մխիթարյանը, Լճկաձորի գյուղապետ Սուրեն Մարտիրոսյանը այցելել են Լճկաձոր գյուղի բնակիչ, հոկտեմբերի 2-ի սողանքից զոհված Նորիկ Միրզոյանի տուն՝ նրան հանձնել կառավարության հատկացրած 1 միլիոն դրամը:
Նորիկ Միրզոյանին պատկանող «ՎԱԶ-2106» մեքենայի վիճակը վատ է, ջարդված մեքենայից կարող է պիտանի լինել միայն շարժիչը: Տավուշի մարզպետարանի տարածքային կառավարման վարչության պետ Միշա Մխիթարյանից էլ տեղեկացանք, որ սողանքից տուժել է Տավուշի մարզի բնակիչներին պատկանող 12 մեքենա:
Բնական աղետից տուժածներին ֆինանսական փոխհատուցում հատկացնելու վերաբերյալ Տավուշի եւ Լոռու մարզպետներին վարչապետ Տիգրան Սարգսյանի հանձնարարականի կատարումն ընթացքի մեջ է: Այդ նպատակով պետբյուջեից գումար է հատկացվել, սակայն դեռ պետք է որոշվի գումարի բաշխման կարգը՝ ով որքան է ստանալու:
Վարչապետի այդ հանձնարարականը կատարելու համար Տավուշի մարզպետարանը դեռ մի շաբաթ ժամանակ ունի: Իսկ Միրզոյանների ընտանիքը հիշում է Նորիկ Միրզոյանին: Նրա այրին` 62-ամյա Բավականն ասաց, որ իր ամուսինը սողանքի վայրում, ճանապարհին մեքենայով հայտնված շատ համագյուղացիների կյանքն է փրկել, մինչ փլուզումը նրանց հորդորելով գյուղ հասնել վերեւով ձգվող խճապատ ճանապարհով:
Կարդացեք նաև
Հիշեցնենք, որ Նորիկն այդ ժամանակ թոռան հետ վերադառնում էր այգուց: Նա մոտեցել է սողանքի վայրին, փորձել օգտակար լինել: Սողանքն սկսվելուց հետո պապը վազել է իր անվանակից՝ 15-ամա թոռնիկի հետ: Կրտսեր Նորիկը 10-15մ վազելուց հետո պապին այլեւս չի տեսել:
Ոսկան ՍԱՐԳՍՅԱՆ
