Ռեժիսորի «Ժաննան եւ ձայները» լիամետրաժ գեղարվեստական ֆիլմն ունենում է համաշխարհային պրեմիերաներ:
Ռեժիսոր Միքայել Վաթինյանի «Ժաննան եւ ձայները» լիամետրաժ գեղարվեստական ֆիլմը 2011թ. հոկտեմբերին ունեցավ համաշխարհային պրեմիերա Ասիայի ամենամեծ` Պուսանի կինոփառատոնում: Ֆիլմի արտադրությանն աջակցել են Հայաստանի ազգային կինոկենտրոնը, «Ոսկե ծիրան» կինոյի զարգացման հիմնադրամը, Գյոթեբորգի միջազգային կինոփառատոնը: Այսօր լրագրողների հետ հանդիպման ընթացքում «Ոսկե ծիրանի» հիմնադիր Հարություն Խաչատրյանը հայտնեց, որ ֆիլմը միջազգային համատեղ կինոարտադրության լավագույն օրինակն է. «Հայկական կինոն կարիք ունի նոր մոտեցման ու ձեռագրի, ինչը տեսա այս ֆիլմում»: Գլխավոր դերակատարներն են ռեժիսոր Միքայել Վաթինյանը եւ պրոդյուսեր Արմինե Անդան: Վերջինիս խոսքերով` ֆիլմի վրա երկար են աշխատել, գործադրելով առավելագույն ջանքերը. «Երջանիկ ենք, որ այն համաշխարհային պրեմիերա ունեցավ: Հմայված եմ փառատոնից եւ ջերմ հանդիսատեսից»: Միքայել Վաթինյանը դժվարացավ ֆիլմից խոսել, քանի որ, նրա ձեւակերպմամբ՝ այն դիտելու համար է, ոչ թե խոսելու: Ռեժիսորը տեղեկացրեց, որ ֆիլմը Ժաննա դ՛Արկի պատմության ժամանակակից տարբերակն է. հերոսուհին ճանապարհորդում է Արցախով եւ Հայաստանի մարզերով` հանդիպելով տարբեր մարդկանց: «Դա մի փորձ էր` գնահատել տարանջատված իրողությունը, որի մեջ ապրում ենք: Ժաննան այն մարդկանց ձայներն է լսում, որոնց հանդիպում է»,-ասաց ռեժիսորը:
Սերբ բեմանկարիչ Իվանա Կրչադինացը, որը ներկայումս ապրում է Հայաստանում, նշեց. «Ես կհամաձայնեմ կրկին աշխատել այսպիսի թիմի հետ»:
Սիրիացի բեմադրող-օպերատոր Թամամ Համզան աշխատանքային մթնոլորտը դրական գնահատեց. «Ամենեւին չեմ զգում, որ էմիգրանտ եմ»:
«Ժաննան եւ ձայները» պատիվ ունի հրավիրվելու Գյոթեբորգի միջազգային կինոփառատոնի կողմից, որի ընթացքում հունվարի վերջին կունենա իր սկանդինավյան պրեմիերան: Ֆիլմի երեւանյան պրեմիերան, հավանաբար, տեղի կունենա «Ոսկե ծիրան» կինոփառատոնի շրջանակներում:
Լուիզա ՍՈՒՔԻԱՍՅԱՆ
