Էրեբունու ոստիկանապետ Գրիգոր Գրիգորյանն ազատվել է զբաղեցրած պաշտոնից: Ըստ «Ազատություն» ռադիոկայանի՝ Էրեբունու նոր ոստիկանապետ է նշանակվել մինչ այժմ ոստիկանության Քանաքեռ-Զեյթունի բաժինը գլխավորած Գագիկ Գաբրիելյանը: Գրիգոր Գրիգորյանն ուղարկվել է կադրերի ռեզերվ:
Ոստիկանության Երեւան քաղաքի վարչության պետ Ներսես Նազարյանն «Ազատություն» ռադիոկայանի հետ զրույցում ասել է, որ Էրեբունու ոստիկանապետի պաշտոնանկությունը առնչություն ունի նրա ենթակա, Էրեբունու փոխոստիկանապետ Միհրան Քեշիշյանի դեպքի հետ: Կաշառառության մեջ կասկածվող Քեշիշյանը վերջին օրերին փախուստի մեջ է, նրա նկատմամբ հայտարարված է հետախուզում:
«Տեղակալի հետ կապված դեպքը որ տեղի է ունեցել, միանշանակ պետք է արդյունքում լիներ նաեւ սա: Ամեն մի ղեկավար պատասխանատու է իր անձնակազմի համար», – ասել է Ներսես Նազարյանը:
Հիշեցնենք` Էրեբունու ոստիկանապետի օպերատիվ գծով տեղակալ Քեշիշյանը կասկածվում է 13 հազար դոլար կաշառք վերցնելու մեջ` միջնորդների միջոցով մի քաղաքացու քրեական պատասխանատվությունից ազատելու համար: Նրա նկատմամբ խափանման միջոց է ընտրվել կալանավորումը, բայց ինչպես տեղեկացրեց Ներսես Նազարյանը, Էրեբունու փոխոստիկանապետի գտնվելու վայրը դեռ անհայտ է:
Կարդացեք նաև
«Ինձ թվում է ինքը խելամիտ կլինի եւ կգա, կներկայանա, եթե` ոչ, կգտնեն միանշանակ, չի կարող փախուստի մեջ մնալ», – ասաց Նազարյանը:
