Մանկապիղծների՝ քիմիական ճանապարհով ամլացումը հարցի լուծում չէ, դա չի վերացնի սեռական հակումը, այսինքն՝ անձը, ինչպես որ նախքան ամլացումն է եղել պեդոֆիլ, այդպես էլ կմնա ամլացումից հետո: Aravot.am-ի հետ զրույցում նման կարծիք հայտնեց բժիշկ-սեքսոլոգ Նարինե Ներսիսյանը՝ պատասխանելով մեր այն հարցին, թե արդյոք ԱԺ-ում ներկայումս քննարկվող մանկապիղծներին քիմիական ճանապարհով ամլացնելու մեթոդը ճի՞շտ է, թե՝ ոչ: Ըստ նրա, ամլացումից պեդոֆիլի հակումը նույնը կմնա. «Հնարավոր է՝ ամլացումից հետո պեդոֆիլն ավելի այլասերված մեթոդների դիմի, օրինակ՝ բռնություն գործի ֆալոիմիտատորով (արհեստական առնանդամ): Ճիշտ է, էրեկցիա չի ունենա, բայց իր հակումը կբավարարի: Իսկ պեդոֆիլիան տղամարդու սեռական օրգանի հետ կապ չունի»:
Բժիշկ-սեքսոլոգի խոսքերով՝ զարգացած երկրներում մանկապիղծները սովորական հանցագործների հետ միեւնույն բանտում չեն կրում իրենց պատիժը, ինչպես որ ընդունված է մեզ մոտ. «Ամբողջ աշխարհում պեդոֆիլներն ու հերոնտոֆիլները՝ տարեցների նկատմամբ սեռական հակում ունեցողները, հատուկ հիմնարկներում են իրենց պատիժը կրում՝ բուժման մեթոդների կիրառմամբ»: Ըստ բժշկի, թեեւ աշխարհում ինչ-որ փորձարկումներ արվում են այս մարդկանց բուժելու ուղղությամբ, բայց գրեթե տվյալներ չկան, որ նրանք լիարժեք բուժվում են:
Նշենք, որ Ազգային ժողովում առաջին ընթերցմամբ ընդունվել է մանկապիղծների՝ քիմիական ճանապարհով ամլացմանն առնչվող օրինագիծը՝ անցնելով 2-րդ փուլ:
Նելլի ԲԱԲԱՅԱՆ
Կարդացեք նաև
