Ծաղկաձորում այսօր շարունակվող «Լրատվամիջոցներն այսօր» թեմայով սեմինարի ընթացքում զեկույցով հանդես եկավ «Հրապարակ» թերթի գլխավոր խմբագիր Արմինե Օհանյանը: Նրա ելույթն առնչվում էր զրպարտության մասին օրենքին: «Հրապարակի» դեմ այսօրվա դրությամբ հարուցվել է վեց դատական հայց, եւ տիկին Օհանյանը, անդրադառնալով ստեղծված իրավիճակին, ասաց, որ եթե ինքը տարիներ շարունակ փորձել է լրագրողների մեջ կոտրել ներքին գրաքննիչին, նրանց ազատ եւ անվախ դարձնել, վերջին դեպքերից հետո, երբ իր թերթի դեմ անընդհատ դատական հայցեր են լինում, ինքն էլ է սկսել ամեն նյութի տակ հերթական դատական գործը տեսնել, եւ ամեն օր սպասել, թե ինչ վատ անակնկալ կարող է բերել նոր օրը: Խմբագիրը պնդում էր, որ այս փակ, ոչ թափանցիկ երկրում անհնար է տպագրել միայն ճշտված տեղեկություններ, այլապես թերթը կվերածվի պաշտոնական հաղորդագրությունների շտեմարանի: Տիկին Օհանյանը իրավիճակից դուրս գալու ելքը գտնում էր Քաղաքացիական օրենսգրքի 1087` զրպարտության մասին հոդվածի հստակեցման մեջ, եւ մեծ հույսեր էր կապում նոյեմբերի 15–ին Սահմանադրական դատարանում սպասվող նիստի հետ, որտեղ վիճարկվելու է Զրպարտության մասին օրենքի սահմանադրականության հարցը:
Մելանյա ԲԱՐՍԵՂՅԱՆ
