Երիտասարդական մասնագիտական կողմնորոշման կենտրոնի ուսումնասիրությունները դպրոցներում ցույց են տվել, որ շրջանավարտներն ամենից շատ ցանկանում են նախարար ու գիտնական դառնալ: «Նրանք անգամ չեն տարբերում զբաղմունքը մասնագիտությունից»,- երեկվա ասուլիսում զարմանում էր կենտրոնի տնօրեն Հայկուհի Գեւորգյանը: Նրա խոսքերով, երիտասարդներին կողմնորոշելու համար կենտրոնն արդեն երեք տարի ջանք ու եռանդ չի խնայում: Այնուհանդերձ, նա դժվարացավ պատասխանել, թե այս տարիների ընթացքում քանի երիտասարդի են արդեն կողմնորոշել, բայց այս տարվա մայիսից սեպտեմբեր ժամանակահատվածում արդեն կողմնորոշել են 12 երիտասարդի: Մինչդեռ ՀՀ աշխատանքի եւ սոցիալական հարցերի նախարարության ենթակայությամբ գործող այս կենտրոնը տարեկան 50 երիտասարդի պետք է օգնի կողմնորոշման հարցում. տարեկան գործունեության համար էլ մի քանի միլիոն դրամի չափով ֆինանսավորվում է պետբյուջեից, օրինակ՝ հաջորդ տարի 20 միլիոն դրամ է նախատեսվել: Տարեկան մի քանի երիտասարդի կողմնորոշող կենտրոնի տնօրենն այդքան էլ գոհ չէ. «Աշխատավարձ, պահպանման հարցեր, ուրիշ ոչ մի ծախս նախատեսված չէ, այնինչ՝ այս համակարգը պետք է ներգրավեր ավելի լայն շրջանակներ»: Տիկին Գեւորգյանը չհամաձայնեց, թե այսօր աշխատաշուկայում չպահանջված մասնագետներ են հատկապես քոլեջների ու ուսումնարանների շրջանավարտները: Նա ասաց, որ միջին մասնագիտությունները մեր երկրում լավ էլ պահանջարկ են վայելում:
Ա. ՍԻՄՈՆՅԱՆ
«Առավոտ» օրաթերթ
