Հատված Հայաստանի սոցիոլոգիական ասոցիացիայի նախագահ Գեւորգ ՊՈՂՈՍՅԱՆԻ հետ հարցազրույցից
–Պարոն Պողոսյան, ինչպե՞ս կգնահատեիք վերջին կադրային փոփոխությունները։
-Ակնհայտ է, որ Երեւանի քաղաքապետի, ոստիկանապետի ու Ազգային ժողովի նախագահի պաշտանանկությունները իրարից տարբերվում են ե՛ւ պատճառներով, ե՛ւ հետեւանքներով: Միաժամանակ բնական ու հասկանալի է, որ տեղի ունեցող ամեն ինչ դիտարկվում է առաջիկա խորհրդարանական ընտրություններին նախապատրաստվելու համատեքստում:
Բայց ես հավատացած եմ, որ կադրային բոլոր փոփոխությունները չեն, որ պայմանավորված են մայիսին` կես տարի հետո տեղի ունենալիք ընտրություններով: Համաձայնեք, որ, օրինակ, Երեւանի քաղաքապետի հրաժարականը բավական տարօրինակ էր:
Ստացվում է, որ իշխանությունը դեմ է արտագաղթին, կառավարությունը «Արի տուն» ծրագիր է իրականացնում, իսկ մայրաքաղաքի կառավարիչը լքում է իր պատասխանատու պաշտոնը, արտագաղթում է` Ռուսաստանում բարձր վարձատրվող աշխատանքի անցնելու համար:
Եթե սա է մտածողությունը, ուրեմն նշանակում է, որ մեր բոլոր նախարարներն ու պատգամավորները հրաժարական են տալու, եթե Ժնեւից կամ Ստրասբուրգից աշխատանքի հրավեր ստանան, երկրի ղեկավարությունն էլ ըմբռնումով է մոտենալու այդ իրողությանը: Այս կերպ միայն «որտեղ հաց` այնտեղ կաց» բանաձեւն է կյանքի նորմ դառնում:
Նույնքան տարօրինակ է նախագահ Սերժ Սարգսյանի նախընտրական շտաբը լավ ղեկավարելու նպատակով քարոզչության փուլից չորս ամիս առաջ Ազգային ժողովի նախագահի հրաժարականը, երբ դեռ շտաբը չի ձեւավորված ու առաջիկա ամիսներին չի գործելու: Հետեւաբար տեղի ունեցող զարգացումների իրական խթաններն ու պատճառները մենք չգիտենք, չենք էլ իմանա, քանի որ իմացողներն այդ ամենը չեն բացահայտում
Գեւորգ ՀԱՐՈՒԹՅՈՒՆՅԱՆ
«Հայոց աշխարհ»
