«Վերջին ամիսներին ԲՀԿ-ն գրավել էր մի այնպիսի դիրք, որ ՀՀԿ-ի եւ նախագահի հետ խոսում էր ուժի դիրքերից: Համապատասխան գործողություններից հետո, ԲՀԿ-ն, կարծես թե, մեկ քայլ ետ նահանջեց՝ վերադառնալով կոալիցիոն հուշագրի դիրքին՝ լավագույն դեպքում՝ երկրորդը լինելուն»,- վերլուծելով վերջին ներքաղաքական զարգացումները՝ այսօր «Իրատես դե ֆակտո» մամուլի ակումբում հայտարարեց ՀԺԱՄ նախագահ Վահրամ Մկրտչյանը: Նա ուշագրավ է համարում, որ այդ առիթով բոլոր կարեւոր հայտարարությունները արվեցին վարչապետի կողմից եւ ոչ թե ԱԺ նախագահի՝ Հովիկ Աբրահամյանի, ով ՀՀԿ-ում ընկալվում էր որպես երկրորդ դեմք. «Սա հուշում էր այն մասին, որ կարծես հեղաշրջման փորձ էր տեղի ունենում: Հովիկ Աբրահամյանի հրաժարականը եւ հենց այդ տեսակետից եմ դիտարկում եւ կարծում եմ, որ այդպիսով կանխարգելվեց հեղաշրջումը: ՀՀԿ-ն զրկեց ԲՀԿ-ին՝ իր թիկունքում խաղալու հնարավորությունից՝ ԱԺ նախագահին հրաժարական պարտադրելով»: Վահրամ Մկրտչյանը ուշադրություն է հրավիրում Հովիկ Աբրահամյանի հեռուստատեսային ելույթի վրա, որտեղ նա «ջանում էր հավատացնել նախագահին, որ իրեն հավատարիմ է՝ ասելով՝ ես հրաժարական տվեցի՝ իմ նվիրվածությունը հայտնելով նախագահին: Կարծես նախագահը թագավորն էր, ինքն էլ՝ նազիրը կամ վեզիրը»: Սերժ Սարգսյանի նախընտրական շտաբի պետի պարտականությունը ստանձնելը, բանախոսի համոզմամբ, Հովիկ Աբրահամյան քաղաքական գործչին, ըստ էության, ասպարեզից դուրս բերելու քայլ էր: Ինչեւէ, գործադիրում այս նախընտրական վերադասավորումները ՀԺԱՄ նախագահը համարում է «Շատ թույլ քայլեր, քանի որ որեւէ գնահատական չի տրվում որեւէ պաշտոնյայի կատարած աշխատանքին, այդպիսով նաեւ հաջորդի անելիքները չի ուրվագծվում: Խաչմերուկը կարգավորելու փոխարեն՝ միլիցիոներին են փոխում»:
Եթե Հովիկ Աբրահամյանի՝ Սերժ Սարգսյանի հավատարմության երդումին չհետեւի ԲՀԿ առաջնորդ Գագիկ Ծառուկյանի հավատարմության երդումը , Վահրամ Մկրտչյանի կանխատեսմամբ, շուտով ականատեսը կլինենք արհեստածին կոալիցիայի փլուզմանը: Նա ֆեոդալական է համարում ոչ միայն իշխանական կոալիցիան, այլ նաեւ ՀԱԿ-ը, որտեղ ֆեոդալը առաջին նախագահն է՝ «մնացյալը՝ մանր-մունր վազվզողներ»:
Առաջիկա ընտրությունները բանախոսը համարում է կարեւոր, քանի որ երիտասարդները այլեւս դուրս են գալիս ֆեոդալական մտածելակերպից, իսկ ապագան երիտասարդությանն է:
Նելլի ԳՐԻԳՈՐՅԱՆ
