ՀՀ սպորտի եւ երիտասարդության հարցերի փոխնախարար Խաչիկ Ասրյանը մեկնաբանում է իրեն տարածքային կառավարման նախարար նշանակելու մասին լուրերը
– Ես իմ ազգի, ժողովրդի նվիրյալ զավակն եմ ու ՀՀ նախագահի եւ կարգադրությամբ, եւ առաջարկով, եւ հրամանով պատրաստ եմ լինել ցանկացած տեղ, այդ թվում՝ դժոխքի դարպասների պահակը, եթե այդ աշխատանքն էլ ավելի է նպաստելու իմ պետականության զարգացման գործընթացներին։
– Այսինքն Ձեզ հետ նման հարց չի՞ քննարկվել։
– Ոչ, ընդհանրապես ՀՀ նախագահն ինձ չի կանչել իր մոտ, չենք հանդիպել, նման խոսակցություն չի եղել։ Ես կարծում եմ՝ ավելի շատ այդ խոսակցությունները ԶԼՄ–ների կողմից արտահանած նյութեր են։ Անկեղծ ասած՝ չգիտեմ ինչու են նման բաներ գրել, բայց շնորհակալ եմ, որ իմ աշխատանքը գնահատում են, սկսած լրատվամիջոցներից, վերջացրած շարքային քաղաքացիներով։
Կարդացեք նաև
– Ըստ խոսակցությունների, Դուք եք այդ լուրերը շրջանառության մեջ դրել։
– Ես ոչ մի առաջարկ չեմ ստացել, ուստի նման լուրեր տարածել չէի կարող։ Հանրապետության նախագահն ինքը պետք է որոշի՝ Արմեն Գեւորգյանը կշարունակի՞ պաշտոնավարել, թե՞ ոչ, եւ եթե ոչ, ով կփոխարինի նրան։ Իմ ընկերների եւ գործընկերների աշխատանքին գնահատական տալն ու նրանց ճակատագրի մասին ցանկություններ հայտնելը կոռեկտ չեմ համարում։
– Այնուամենայնիվ Դուք ուզո՞ւմ եք դառնալ տարածքային կառավարման նախարար։
– ՀՀ նախագահի որոշումներն ու հրամանները, ուղղված ոչ միայն ինձ, այլեւ պետական դաշտին, իմ կողմից ողջունելի եւ ընդունելի են, բայց այն, որ վաղը ես ոլորտ պետք է ղեկավարեմ, համակարգեմ, այս պահի դրությամբ ես նման տեղեկատվություն չունեմ եւ ակտիվ, ինտենսիվ աշխատում եմ որպես սպորտի եւ երիտասարդության փոխնախարար։ Իսկ ցանկության մասին՝ պետք է անկեղծ լինեմ, իսկական զինվորը չի կարող չերազել գեներալ դառնալու մասին։
Լուսինե Շահվերդյան
«Հրապարակ»
