Հատվածներ օլիմպիական չեմպիոն, ՀՀ նախագահ Սերժ Սարգսյանի խորհրդական Յուրի Վարդանյանի հետ հարցազրույցից:
– Երկու Կարեն Կարապետյանների հրաժարակա՞նն էլ է կապված խանգարողներից ազատվելու հետ:
– Նրանք երկուսն էլ պարկեշտ մարդիկ են: Ես աշխատել եմ նախագահի աշխատակազմի ղեկավար Կարեն Կարապետյանի հետ, նա նախագահին նվիրված անձնավորություն է, եւ մտածում եմ, որ նա, տեսնելով այս խնդիրները, ուղղակի չդիմացավ եւ հեռացավ: Համոզված եմ, որ եթե նախագահն ավելի շուտ սկսեր այս գործընթացը, ապա նա հաստատ կմնար իր պաշտոնում:
– Հնարավո՞ր է, որ Ձեր նշած խանգարողներն այլ գործչի, այլ գործի նվիրյալներ են: Հնարավոր համարո՞ւմ եք Ռոբերտ Քոչարյանի վերադարձը:
Կարդացեք նաև
– Ես, որպես հայ մարդ, որպես ՀՀ քաղաքացի՝ բացառում եմ նրա վերադարձի հնարավորությունը: Բայց որ նա պաշտոնանկությունից հետո միշտ էլ ակտիվորեն գործել է, որ նա իշխանության մեջ ունեցել է եւ ունի իր սեփական թիմը՝ դա փաստ է:
– Կարծես թե անընդհատ խնդիրներ են առաջանում կոալիցիայի երկու խոշոր միավորների՝ ՀՀԿ-ի եւ ԲՀԿ-ի միջեւ, որոնք անընդհատ հարթելու անհրաժեշտություն է առաջանում: Ըստ Ձեզ՝ որքա՞ն կարող է այս վիճակը շարունակվել:
– Քաղաքականության մեջ պետք է ունենալ ազնվություն եւ համարձակություն՝ սեփական տեսակետն արտահայտելու համար: Եթե դեմ ես վարվող քաղաքականությանը, եթե չես կիսում վարվող քաղաքականության պատասխանատվությունը, պետք է դրա մասին ասել պարզ եւ հստակ ու դուրս գալ կոալիցիայից: Բայց եթե ԲՀԿ-ն ոչ մի գաղափարախոսական տարաձայնություն չունի ՀՀԿ-ի հետ, եւ երկուսի նպատակն էլ նույնն է՝ կառուցել ժողովրդական, ժամանակակից, բարեկեցիկ ու բարգավաճ Հայաստան, եթե տարաձայնություններ չկան վարվող քաղաքականության հետ, եւ ԲՀԿ-ն, ինչպես 2008-ին պաշտպանեց Սերժ Սարգսյանի թեկնածությունը, այնպես էլ 2013-ին է պատրաստվում պաշտպանել նախագահ Սերժ Սարգսյանին, ապա ավելի տրամաբանական չէր լինի, որ այն ինքնալուծարվեր եւ միանար ՀՀԿ-ին: Ինչ վերաբերում է տեխնիկական խնդիրներին, ապա այդպիսի խնդիրներ լինում են ցանկացած կուսակցության ներսում, բայց դրանք հարթվում են:
– Լեւոն Տեր-Պետրոսյանն ուզում է վերադառնալ, Ռոբերտ Քոչարյանն ուզում է վերադառնալ, ինչո՞ւ Հայաստանում նախագահները չեն կարողանում հեռանալուց հետո զբաղվել այլ գործով, այլ զբաղմունք գտնել իրենց համար: Միգուցե Հայաստանի նախագահական աթոռի տակ մագնի՞ս կա, որն անընդհատ ձգում է:
– Նրանք, նախագահ աշխատելով, իսկ հետո հեռանալով՝ մտածում են, որ կարող էին իրենց համար անել ավելին, քան արել են: Օրինակ, ես համոզված եմ, որ Սերժ Սարգսյանը երկրորդ ժամկետում պաշտոնավարելուց հետո երբեք չի մտածի վերադառնալու մասին: Սա ես ասում եմ՝ իրեն ամբողջությամբ ճանաչելով:
Ավետիս Բաբաջանյան
«Հրապարակ»
