Ֆրանսիան եւ Գերմանիան Եվրահանձնաժողովի հետ իասին հինգշաբթի օրվանից կսկսեն նախապատրաստել Ֆինանսական կայունության եվրոպական հիմնադրամի աշխատանքները` հոկտեմբերի 27-ին ձեռքբերված պայմանավորվածությունների շրջանակներում: РИА Новости-ի մատուցմամբ, այս մասին չորեքշաբթի հայտարարել է Ֆրանսիայի նախագահ Նիկոլա Սարկոզին:
«Մենք ուզում ենք համակարգված, հաստատուն եւ վճռական, եվրոպական պատասխան, որը կուղեկցվի հոկտեմբերի 27-ին ընդունված որոշումների իրականացմամբ: Այդ որոշման կենսագործումը կարագացվ»,- ասել է Սարկոզին` հավելելով, որ հինգշաբթի օրվանից Գերմանիայի եւ Ֆրանսիայի ֆինանսների նախարարները եվրահանձնակատար Օլլի Ռենի հետ միասին կսկսեն Եվրոպական հիմնադրամի ակտիվացման աշխատանքները:
440 մլրդ եվրո ընդհանուր ծավալով Ֆինանսական կայունության եվրոպական հիմնադրամի ստեղծման որոշումը ընդունվել է դեռ 2010թ. մայիսին: Հիմնադրամի նպատակը Եվրոպայում ֆինանսական կայունությանը նպաստելն է ու եվրոգոտու պետություններին տնտեսական դժվարությունները հաղթահարելու նպատակով ֆինանսական օգնություն տրամադրելն է: 2011թ. հուլիսին տարածաշրջանի 17 պետությունների եւ կառավարությունների ղեկավարները որոշում ընդունեցին ընդլայնել հիմնադրամի հնարավորությունները: ԱՐդեն հոկտեմբերի 27-ին ԵՄ եւ եվրոգոտու պետությունների ղեկավարների որոշմամբ հիմնադրամի ֆինանսական ծավալն ընդլայնվեց` հասնելով 1 տրիլիոն եվրոյի:
