Ուկրաինայի նախկին վարչապետ Յուլիա Տիմոշենկոն դիմել է Եվրամիության ղեկավարությանը` խնդրելով, չնայած իր կալանավորմանը, չհրաժարվել Ուկրաինայի հետ ասոցացման պայմանագիր կնքելու մտադրությունից:
Ինչպես հաղորդում են արեւմտյան լրատվամիջոցները, անգլերեն լեզվով գրված նամակում, որը տարածվել է Տիմոշենկոյի մամուլի ծառայության կողմից, նախկին վարչապետը համոզում է ԵՄ-ին` «անտեսել ուկրաինական հանցագործ իշխանությունների գործողությունները» եւ շեշտում, թե համաձայնագրի ստորագրումից հրաժարվելը «ողբերգություն կլիներ, որը կստվերեր Ուկրաինայի ապագան առաջիկա տասը տարիների կտրվածքով»:
«Ես չէի ցանկանա, որ իմ երկրի` եվրոպային ինտեգրվելու հեռանկարը տուժի որեւէ եւ հատկապես իմ պատճառով»,- BBC-ի փոխանցմամբ, ԵՄ ղեկավարությանն ուղղած իր նամակում գրել է Յուլիա Տիմոշենկոն:
