Վերջին շաբաթների ընթացքում ՀՀ իշխանական վերնախավում, այդ թվում՝ գործադիր եւ օրենսդիր մարմիններում, պաշտոնյաների տեղի ունեցող փոխատեղումներն ընդամենը նախընտրական վերադասավորումներ են: «Առավոտի» հետ զրույցում անդրադառնալով Երեւանի քաղաքապետի, ՀՀ ոստիկանապետի եւ ՀՀ ԱԺ նախագահի պաշտոնանկություններին՝ հայտարարեց Ազատ դեմոկրատներ կուսակցության ղեկավար Խաչատուր Քոքոբելյանը:
«Այն, որ Հայաստանում արմատական փոփոխությունների անհրաժեշտություն վաղուց կար՝ ակնհայտ է: Բայց այս փոփոխություններն արմատական չենք համարում, որովհետեւ իրենց բնույթով արմատական չեն: Դրանք ավելի շատ նախընտրական շրջանին բնորոշ եւ կոնկյունկտուրային փոփոխություններ եմ համարում, որոնք ուղղված են գործող իշխանությունների վերարտադրությանը»,- ասաց Քոքոբելյանը՝ չբացառելով կադրային նոր տեղաշարժերի հնարավորությունը:
Խոսելով մասնավորապես ՀՀ ոստիկանապետի պաշտոնում Ալիկ Սարգսյանին Վլադիմիր Գասպարյանով փոխարինելու մասին՝ կուսակցության ղեկավարը կարծիք հայտնեց, թե նորանշանակ ոստիկանապետը շատ ավելի ուժեղ ղեկավար կլինի, քան Ալիկ Սարգսյանն էր. «Ես անկեղծորեն այդպես եմ կարծում: Իհարկե, ուժի արտահայտության իմ չափանիշն այլ է. ուժեղ ոստիկանապետը նա է, ով օրինապաշտ միջավայր է ստեղծում»:
Քոքոբելյանը միաժամանակ կարծիք հայտնեց, թե իշխանական օղակներում տեղի ունեցող եւ դեռ սպասվելիք հնարավոր փոփոխություններով իշխանական ճամբարում քաղաքական թիմերի հարաբերությունների հարց է լուծվում, «ՀՀԿ-ն ամրապնդում է իր դիրքերը»: Ընդսմին, նա չբացառեց նաեւ սոցիալական խնդիրներին ուղղված փոփոխությունների հնարավորությունը, որոնք միտված կլինեն հասարակական ներքին միավորման խնդիրը լուծելուն, բայց իրենց խորքում դրանք, ըստ Քոքոբելյանի, իմիտացիոն բնույթ են կրելու:
Կարդացեք նաև
