Տավուշի մարզի Լուսաձոր գյուղի բնակչուհի Սոֆյա Այվազյանն այս տարվա հուլիսի 22-ին եւ 27-ին գրավոր դիմել է ՀՀ ճանապարհային ոստիկանության պետին ու հայտնել, որ գյուղում իր հարեւան Կարո Այվազյանը եւ նրա որդին`Արման Այվազյանը, որը ժամկետային ծառայության մեջ է, ծառայում է Երեւանում, օգտագործում են Կարոյի հոր` Հրանդիկ Այվազյանի անվամբ գրանցված «ԳԱԶ» մակնիշի բեռնատարը. որը չունի պետական համարանիշներ, չի անցել տեխնիկական զննություն: Ճանապարհային ոստիկանության պետի պաշտոնակատար Լ. Մելքոնյանը օգոստոսի 12-ին գրավոր պատասխանել է. «Քաղաքացի Կ. Այվազյանի նկատմամբ 23.07.2011թ. առանց հաշվառման համարանիշների ավտոմոբիլը շահագործելու համար կազմվել է համապատասխան վարչական իրավախախտման արձանագրություն: Հայտնում ենք նաեւ, որ վերջինս եւ իր հայրը նախազգուշացվել են` հետագայում չշահագործել առանց հաշվառման համարանիշի ավտոմոբիլը»: Հրանդիկ Այվազյանի մեքենան չի ունեցել ոչ պետհամարանիշներ, ոչ տեխնիկական զննություն է անցել, ոչ էլ ունեցել է պարտադիր պետական ապահովագրություն, սակայն Ճանապարհային ոստիկանությունը միայն առանց համարանիշներ վարելու համար է կազմել վարչական իրավախախտման արձանագրություն: Բազմաթիվ բողոքներից հետո, հոկտեմբերի 9-ին Սոֆյա Այվազյանը ինտերնետային նամակով բողոքել է ՀՀ ոստիկանապետ Ալիկ Սարգսյանին. «Իմ դիմումի կապակցությամբ վարչությունից եկան 2 աշխատակից, ինձ ստիպում էին, որ ես բացատրության մեջ նշեմ, որ շնորհակալ եմ տեղի «ԳԱԻ» պետ Բոյաջյանից, այնինչ՝ ես դժգոհ եմ նրա դանդաղկոտության եւ ժամանակին դիմումիս ընթացք չտալու համար: Ես Բոյաջյանից դժգոհ եմ այն բանի համար ,որ իմ 3 ահազանգերին ժամանակին ընթացք չի տվել»:
Փորձեցինք այս առթիվ իմանալ Ճանապարհային ոստիկանության աշխատակից Կարեն Բոյաջյանի տեսակետը: Սակայն նրա բջջային հեռախոսահամարը չէր սպասարկվում: Սպասվում է, որ այս գործով առաջիկայում ՃՈ նոր հանձնախումբ կգա Իջեւան եւ Լուսաձոր:
Ոսկան Սարգսյան
