Հաջորդ տարեսկզբից փոքր եւ միջին բիզնեսի ձեռնարկատերերն այլեւս ստիպված չեն լինի տարածքի վարձակալության պայմանագրերը վավերացնել նոտարում, բավական է միայն գրանցումը հաստատել կադաստրում: Այս մասին այսօրվա ասուլիսում ասաց գործարար շահերի պաշտպանության ցանց հ/կ համակարգող Գագիկ Պողոսյանը: Նրա խոսքերով, այսօր կառավարությունում տեղի ունեցած ՓՄՁ խորհրդի նիստի ժամանակ, որոշվել է ձեռնարկատերերից պետական տուրքը գանձել հաստատագրված չափով եւ ոչ թե տարածքի մեծության հաշվարկով: Փոքր ու միջին բեռների փոխադրման ծախսերն էլ նվազագույնի հասցնելու համար խորհուրդը որոշել է զարգացնել արտահանումը մեքենաների միջոցով: Ներկրողի ու տեղական արտադրողի համար էլ բիզնեսը զարգացնելու համար հավասարությունն է պակասում. Խորհուրդը որոշել է հավասար պայմաններ ստեղծել: « Ներկրված ապրանքն ավելի էժան է, քան տվյալ արտադրանքի արտադրությունը մեր երկրում, ներկրողի ու տեղական արտադրողի միջեւ անհավասար պայմաններ կան, առաջարկել ենք փոփոխություններ ավելացված արժեքի հարկերի մասով»,- մանրամասնեց պարոն Պողոսյանը:
Արփինե ՍԻՄՈՆՅԱՆ
