Հայաստանում սուպերմարկետները խնդիր են փոքր ու միջին բիզնեսի զարգացման ճանապարհին: Այդ խնդիրը պետք է լուծվի ինչ-որ քաղաքականության միջոցով: aravot.am-ի հետ զրույցում նման կարծիք հայտնեց «Գործարար շահերի պաշտպանության ցանց» հասարակական կազմակերպության համակարգող Գագիկ Պողոսյանը՝ միաժամանակ պնդելով, թե գործարարներին սուպերմարկետ հիմնելն արգելելն էլ գործարար միջավայրում անհավասար պայմաններ կստեղծի. «Մյուս կողմից էլ, երբ խոշորի կենտրոնացում է լինում, փոքր բիզնեսն էլ կարող է փակվել»: Նա դժվարացավ գնահատել կառավարության առաջարկած հարկային օրենքների փոփոխությունների նոր փաթեթը՝ նշելով, որ մամուլից է ծանոթացել առաջարկվող փոփոխություններին. «Համենայնդեպս, առաջարկվող փոփոխությունները փոքր բիզնեսին հաստատ չեն առնչվում»: Ստվերն ավելի շատ խոշո՞ր, թե՞ փոքր բիզնեսում է, այս հարցին դժվարացավ պատասխանել պարոն Պողոսյանը, իսկ Տրանսպորտային առաքողների միության նախագահ Եղիշե Հովհաննիսյանն էլ հավելեց. «Կարծում եմ՝ 2 տեղում էլ կա, թե հիմա ինչ քանակությամբ, ինչ նշանակություն ունի, կարեւորը այն է, որ կա ու պետք է վերացվի»:
Արփինե ՍԻՄՈՆՅԱՆ
