Չնայած այս տարի կարկտահարությունից ու ցրտահարությունից գյուղացու բերքը մեծ վնասներ է կրել, այնուամենայնիվ, ընկերությունները, նախորդ տարվա համեմատ, ավելի մեծ ծավալներով են մթերում արել:
Այս տարի գործարարներն ավելի շատ ու ավելի բարձր գներով են գյուղատնտեսական ապրանքներ մթերել, քան նախորդ տարի: Լոլիկի գինը տատանվել է 31-80, վարունգինը՝ 120-150, սմբուկինը՝ 30-60, ծիրանինը 400-800, խաղողինը՝ 130-280 դրամի սահմաններում: Այս մասին այսօր «Սլաք» ակումբում տեղի ունեցած մամուլի ասուլիսին հայտնեց գյուղատնտեսության փոխնախարար Ռոբերտ Մակարյանը: Ըստ նրա, այս տարի ընդհանուր առմամբ մթերվել է 48342 տ պտուղ-բանջարեղեն: Խոսելով գործարանների՝ գյուղացիներին ունեցած պարտքերի մասին, նա ասաց, որ խաղողի մթերումներ իրականացնող 40 ընկերությունից 20-ը խաղողի դիմաց ողջ գումարը վճարել են գյուղացիներին, իսկ մյուսները՝ մասնակի: Մասնակի պարտքերն էլ, ըստ նրա, ընկերությունները պարտավորվել են մարել մինչեւ 2012 թվականի հունվարի 1-ը: Անդրադառնալով պտուղ-բանջարեղենի արտահանմանը՝ փոխնախարարը նշեց, որ մինչեւ հիմա արտահանվել է 858 տոննա մթերք, որից 7300-ը՝ ծիրան, 673 տ՝ կեռաս, 258 տ՝ բալ եւ այլն: Պարոն Մակարյանը հայտնեց, որ Հայաստանը պտուղ-բանջարեղեն է արտահանում հիմնականում 6 երկիր՝ Ռուսաստան, Վրաստան, Ուկրաինա, Արաբական Միացյալ Էմիրություններ, Բելառուս եւ Նիդերլանդներ: Մթերքների 94 %-ն արտահանվում է ավտոմեքենայով, իսկ 6%-ը՝ ինքնաթիռով:
Նա նաեւ հայտնեց, որ Կասյան փողոցում արդեն 2 ամիս գործող գյուղատնտեսական ապրանքների տոնավաճառի գործունեության ժամկետն ավելացրել են. «Նախատեսված էր մինչեւ նոյեմբերի սկիզբ, բայց փոքր- ինչ երկարացրել ենք՝ ընդառաջ գնալով եւ գյուղացիների, եւ քաղաքացիների խնդրանքներին»: Նա ասաց, որ մյուս տարի նախատեսում են նման տոնավաճառներ ստեղծել Երեւանի եւս 2 վարչական շրջանում:
Անուշ ԽԵՉՈՅԱՆ
