Միացյալ Նահանգների եւ Ֆրանսիայի նախագահներ Բարաք Օբաման եւ Նիկոլա Սարկոզին նոյեմբերի 4-ին Կաննում պաշտոնական արարողությամբ կտոնեն Լիբիայում ՄԱԿ-ի մանդատով իրականացված ՆԱՏՕ-ի գործողությունների ավարտը, որը պսակվեց Լիբիայի առաջնորդ Մուամմար Կադդաֆիի ֆիզիկական ոչնչացմամբ:
«Երեկ կեսգիշերին, յոթ ամիս տեւած հաջող ջանքերից հետո, ավարտվեց լիբիական ժողովրդին պաշտպանելուն եւ աջակցելուն ուղղված ՆԱՏՕ-ի «Միավորված պաշտպան» գործողությունը: Լիբիական ժողովուրդը հասավ ազատության: Նոյեմբերի 4-ին, «G20»-ի գագաթաժողովից հետո, նախագահ Օբաման եւ Ֆրանսիայի նախագահ Սարկոզին կմասնակցեն ԱՄՆ-ի եւ Ֆրանսիայի ռազմական միության պատվին կազմակերպվելիք արարողությանը»,- հայտարարել է Սպիտակ տան պաշտոնական ներկայացուցիչ Ջեյ Կարնին:
РИА Новости-ի փոխանցմամբ, Օբաման եւ Սարկոզին արարողության ժամանակ կշփվեն լիբիական գործողությանը մասնակցած ամերիկացի եւ ֆրանսիացի զինծառայողների հետ:
Հիշեցնենք, որ Լիբիայում զինված ապստամբությունը տեւեց շուրջ 9 ամիս: Իշխող ռեժիմի եւ ընդդիմության դիմակայության ողջ ընթացքում զոհվեցին հազարավոր մարդիկ, նավթով հարուստ այդ երկրի տնտեսությունը ահռելի վնասներ կրեց, երկիրը 42 տարի ղեկավարած Մուամմար Կադդաֆին սպանվեց հոկտեմբերի 20-ին՝ իր հայրենի Սիրթ քաղաքի մատույցներում՝ ընդդիմադիր ուժերի գրոհայինների կողմից գերեվարվելուց հետո:
