«Մանկապիղծների նկատմամբ որպես հարկադրանքի միջոց քիմիական եղանակով ստերջացման կիրառության հնարավորությունը կամ անհնարինությունը» խորագիրը կրող քննարկման կազմակերպիչ «Կանանց ռեսուրսային կենտրոնը» այսօր անդրադարձավ ԱԺ պատգամավոր Վիկտոր Դալլաքյանի հեղինակած օրինագծին, որը վերաբերում է ՀՀ քրեական օրենսգրքում փոփոխություններ կատարելուն: Ըստ Վիկտոր Դալլաքյանի՝ օրենքի 15-րդ գլխում նախատեսված բժշկական բնույթի հարկադրանքի միջոցների շարքը պետք է համալրվի եւս մեկով՝ «քիմիական եղանակով ստերջացումով»:
Միջոցառման նպատակն էր քննարկել, թե որքանով է Հայաստանում հնարավոր մանկապիղծների նկատմամբ որպես հարկադրանքի միջոց կիրառել քիմիական եղանակով ստերջացումը:
Իրավաբան Դավիթ Թումասյանի համոզմամբ՝ նախագիծը կարգավորում է ստերջացման ենթակա անձանց շրջանակը, ստերջացման իրականացման կարգը. ըստ նրա՝ քիմիական եղանակով ստերջացման երեւույթը կիրառվում է եվրոպական մի շարք զարգացած երկրներում: Քիմիական եղանակով ստերջացումը իրականացվում է հետեւյալ կերպ. սեռական ոտնձգություն կատարած մարդուն ներարկում են տեստոստերոն, որը ժամանակավոր ամլացնում է նրան եւ զրկում սեռական ցանկություններից:
Չնայած այս ամենին՝ մասնագետները դեմ արտահայտվեցին այդ մեթոդին, նշելով, որ մանկապիղծները սեռական խանգարումներ ունեցող անձինք են եւ վերջիններին ամլացնելով չես բուժի, հակառակը՝ նրանք ավելի կագրեսիվանան: Քննարկման մասնակիցները նաեւ նշեցին, որ չնայած նախագիծը լավն է, բայց Հայաստանի համար չէ:
Կարդացեք նաև
Նշենք, որ քիմիական եղանակով ստերջացումը կիրառվում է եվրոպական մի շարք երկրներում (Գերմանիա, Շվեդիա,Դանիա, Միացյալ Թագավորություն, Չեխիա եւ այլն):
