ՀՀ կրթության եւ գիտության նախարար Արմեն Աշոտյանը եւ «Հայաստանի պատանեկան նվաճումներ» հասարակական կազմակերպության գործադիր տնօրեն Արմինե Հովհաննիսյանը ստորագրել են համագործակցության հուշագիր` ուսուցիչների վերապատրաստման, ուղեցույցների եւ մեթոդական ձեռնարկների մշակման, դպրոցական եւ զանգվածային միջոցառումների կազմակերպման վերաբերյալ: ԿԳ նախարարը հուշագրի շրջանակում կարեւորել է հատկապես դպրոցական ծրագրում տնտեսագիտական եւ ձեռներեցության հմտությունների ներգրավումը: Տնտեսագիտություն առարկան պարտադիր չի լինելու, այն ներառվելու է լրացուցիչ կրթական ծրագրերում, որն իրականացվելու է մանկավարժության նորարարական մեթոդներով: Նախարարը մասնավորապես նշել է.«Դպրոցներում երեխաներին ձեռներեցության մասին տարրական գիտելիքներ տալը ժամանակի պահանջ է: Միայն պետության ջանքերը բավարար չեն լրացուցիչ կրթության այժմյան պահանջարկը բավարարելու համար: Փորձը ցույց է տալիս, որ առավել հաջողված են կրթական այն նախաձեռնությունները, որոնք իրականցվում են հասարակական կառույցների հետ համատեղ»:
Ըստ ԿԳՆ հասարակայնության հետ կապերի վարչության հաղորդագրության
