Հոկտեմբերի 29-ին տեղեկացրել ենք, որ Տավուշի մարզի Ներքին Ծաղկավան գյուղի կենտրոնում սողանքից քանդվել է Իջեւան-Նոյեմբերյան ավտոճանապարհից գյուղ մտնող ճանապարհի 30 գծամետր երկարությամբ ձախակողմյան կողնակը եւ երթեւեկելի մասի գրեթե կեսը: Ճանապարհը դարձել է միակողմանի երթեւեկելի եւ շատ վտանգավոր:Այս մասին գյուղապետը տեղեկացրել է մարզպետարանին, մարզպետարանն էլ՝ ՀՀ արտակարգ իրավիճակների նախարարությանը:
Ներքին Ծաղկավանի գյուղապետ Նաիրի Աթաբեկյանը ասաց, որ փլուզված հատվածում սողանքային երեւույթներն սկսվել են դեռ ապրիլին, իսկ աշնանային անձրեւների հետեւանքով սողանքն ավելի է ծավալվել: Գյուղապետն առաջարկել է հարցի լուծման, ճանապարհի վերականգնման տարբերակ. գումարով փոխհատուցել ճանապարհին հարակից սեփականաշնորհված 2 հողամասերի տերերին, եւ նոր ճանապարհ կառուցել այդ հողերով:
Առայժմ ավտոբուսները գյուղի կենտրոնից վերեւ չեն բարձրանում, մարդատարներն էլ 5 մետր երկարությամբ վտանգավոր այդ հատվածը զգուշությամբ են անցնում: Ներքին Ծաղկավան համայնքը նախկինում էլ է եղել սողանքային գոտի: 5 տարի առաջ պետական բյուջեից դրամական փոխհատուցում տրվեց համայնքի 7 ընտանիքի, որոնց տները տուժել էին սողանքից:
Ոսկան Սարգսյան
