Ինչի պատճառով գյուղացիները սպասված բերքը չեն ստացել
Արմավիրի մարզի մի քանի գյուղերի բնակիչներ դժգոհ են տեղական արտադրության «Ազոտովիտ-1» եւ «Ազոցեովիտ-1» պարարտանյութերից: Դաշտ գյուղի բնակիչների ներկայացմամբ՝ պայմանագրով ձեռք բերած պարարտանյութը, որի հետ մեծ հույսեր էին կապում, ոչ մի օգուտ չի տվել. «Համարյա բերք չենք ստացել, մեր հաշվարկներով՝ պարարտանյութն օգտագործելու դեպքում պետք է որ մեր բոլոր ծախսերը փակվեին, դեռ մի բան էլ եկամուտ ստանայինք: Բայց հակառակը ստացվեց: Ո՛չ նորմալ լոլիկ, ո՛ չ էլ բադրիջան գրեթե չստացանք: Կոպիտ ասած՝ էդ պարարտանյութը «սաղացրեցին» մեր վրա»: Նշենք, որ այդ պարարտանյութ արտադրող ընկերությունից էլ վստահեցնում էին, որ հանրապետության մի շարք համայքներում եւս օգտագործվել է «Ազոտովիտ-1» եւ «Ազոցեովիտ-1»-ը, սակայն չեն եղել նման դժգոհություններ:
Հաշվի առնելով այն հանգամանքը, որ տուժած գյուղացիները պատրաստվում են նամակ ուղղել ՀՀ կառավարությանը, այսօր նրանց բողոքները փոխանցեցինք գյուղատնտեսության փոխնախարար Վարդան Կարապետյանին: Ի պատասխան «Առավոտի» հարցին, փոխնախարարը պատասխանեց, որ եթե նույն սրվակի մեջ գտնվող նյութը մի տեղ օգտակար է եղել, մեկ այլ տեղ՝ ոչ, ուրեմն՝ մի տեղ ճիշտ են օգտագործել, մյուսում՝ ոչ. «Ելնելով հարցադրումներից՝ մենք անպայման ուսումնասիրություն կկատարենք տվյալ գյուղում, որպեսզի պարզենք, թե ինչն է պատճառը, որ թունաքիմիկատը ոչ բարենպաստ է օգտագործվել»:
Նելլի ԲԱԲԱՅԱՆ
