«Նոր ժամանակներ» կուսակցության նախագահ Արամ Կարապետյանի կարծիքով՝ այս օրերին եղած պաշտոնանկությունները նորմալ երեւույթ են: Այս մասին նա այսօր լրագրողներին ասաց «Հայելի» ակումբում: Ըստ նրա՝ իշխանությունը, ի դեմս կոալիցիայի, կենտրոնացնում է ամեն ինչ, որ կարողանա հստակ այս փուլը անցնել իր համար օգուտով. «Կարելի է ենթադրել, որ ինչ-որ շարք այդ պաշտոնանկությունների կշարունակվի, մեկ-մեկ լինում են անհասկանալի դեպքեր՝ ինչպես Կարեն Կարապետյանի հրաժարականը՝ քաղաքապետի, որը հեչ նախատեսված չէր» ,- ասաց նա: «Նոր ժամանակներ» կուսակցության նախագահի կարծիքով՝ ստեղծված իրադրությունը չի կարելի կապել երկրորդ եւ երրորդ նախագահների քաղաքական պայքարի հետ: «Ես նորից եմ կրկնում, որոշակի առումով հասկանալի պրոցես է, այսինքն՝ եթե վերցնենք այդ տեսակետից, անձնականը մի կողմ դնենք, Կարեն Կարապետյանի հրաժարականը, Տարոն Մարգարյանի նշանակումը, նշանակում է, որ Հանրապետական կուսակցությունը հատկապես, նաեւ այդ առումով, Երեւանում կենտրոնացնում է իր ռեսուրսը՝ ապագա ընտրություններից առաջ եւ սա հասկանալի պրոցես է»,- ասում է նա: Այս ամենի վերաբերյալ Արամ Կարապետյանն ունի իր դիրքորոշումը. «Հայաստանում կոալիցիան բյուրոկրատական, գաղափարական կառույց չի: Դրա համար էլ կարող են լինել թե՛ կոալիցիայի ներսում խնդիրներ, կարող են լինել եւ այլ կուսակցությունների հետ կապված խնդիրներ: Եթե լիներ գաղափարական կառույց, ապա այդ պարագայում մենք մի քիչ ուրիշ իրավիճակ կունենայինք, ինքը քաղաքական միություն է, դրա համար էլ վիճակը էսպիսին է»:
Հռիփսիմե ՀՈՎՀԱՆՆԻՍՅԱՆ
Կարդացեք նաև
