Նոյեմբերի 2-ին ՀՀ քրեական գործերով վերաքննիչ դատարանում, դատավոր Մանուշակ Պետրոսյանի նախագահությամբ, կլսվի Հայկ Հարությունյանի բողոքի քննությունը: Մասնագիտությամբ խոհարար Հայկ Հարությունյանը Արմավիրի մարզի ընդհանուր իրավասության դատարանի կողմից դատապարտվել է 1 ամսով ազատազրկման: Նրա նկատմամբ կիրառվել է ՀՀ անկախության հռչակման 20-ամյակի կապակցությամբ հայտարարված համաներումը:
Հիշեցնենք, որ անցյալ տարվա սեպտեմբերի 10-ին Հայկն իր փեսայի հետ գնացել էր Արմավիրի մարզի Փարաքարի «Ջոյ Բինգո» խաղատուն: Խաղատան անվտանգության աշխատակիցների՝ Ռաֆայել Մկրտչյանի եւ Արմեն Հովհաննիսյանի հետ այցելուները վեճի էին բռնվել:
Ինչպես Հայկի մայրը՝ Գոհար Չիֆլիկյանն էր մեզ հետ զրույցի ժամանակ տեղեկացրել, որդուն եւ փեսային անվտանգության աշխատակիցները գցել էին մոտակա ջրատարը: Հայկը հայտնվել էր հիվանդանոցում: Հետագայում քրեական գործ էին հարուցել Հայկի նկատմամբ՝ ՀՀ քրեական օրենսգրքի «խուլիգանություն» հոդվածի հատկանիշներով: Հայկը գտնում է, որ իրականում ինքը տուժողն է եւ պահանջում է արդարացման դատավճիռ:
Կարդացեք նաև
Մինչ բողոքը վարույթ կընդունվեր՝ ՀՀ գլխավոր դատախազության շենքի մոտ էլ անժամկետ հացադուլ էր հայտարարել Հայկի մայրը՝ տիկին Գոհարը: Նա իր հետ բերել էր բենզինի տարա, որ դիմի ինքնահրկիզման: Մոր գործով էլ զբաղվում է ՀՀ ոստիկանության Կենտրոնի բաժինը: Տիկին Գոհարից վերցրել են բացատրություն: Նրա շահերը կներկայացնի ՀՀ փաստաբանների պալատի անդամ, փաստաբան Անժելա Կարապետյանը եւ «Ընդդեմ իրավական կամայականության» իրավապաշտպան կազմակերպությունը:
Ռուզան ՄԻՆԱՍՅԱՆ
