Հոկտեմբերի 31-ին Միացյալ Նահանգները կատարեց ավելի վաղ տված իր խոստումն ու հայտարարեց ՅՈՒՆԵՍԿՕ-ի ֆինանսավորումը դադարեցնելու մասին: Դա տեղի ունեցավ այն բանից հետո, երբ Պաղեստինի Ինքնավարությունը դարձավ այդ կազմակերպության անդամ:
ԱՄՆ-ի այդ որոշման մասին երկուշաբթի երեկոյան հայտարարեց Պետդեպարտամենտի պաշտոնական ներկայացուցիչ Վիկտորիա Նուլանդը: «ԱՄՆ-ն չի տրամադրի ՅՈՒՆԵՍԿՕ-ի անդամակցության հերթական 60 մլն դոլարի տրանշը: Պաղեստինի վերաբերյալ կազմակերպության անդամների այսօրվա քվեարկությունը վաղաժամ էր: Այն վնասում է Մերձավոր Արեւելքում խաղաղության հասնելու հարցում մեր ընդհանուր շահերին: Մենք ցավում ենք սրա համար»,- ճեպազրույցի ժամանակ հայտարարել է Նուլանդը:
ԱՄՆ-ն 60 մլն դոլարը պետք է կազմակերպությանը տրամադրեր մինչեւ նոյեմբերի վերջը: Վաշինգտոնի այս հնարավոր քայլի մասին զգուշացրել էր ԱՄՆ պետքարտուղար Հիլարի Քլինթոնը:
ՅՈՒՆԵՍԿՕ-ի բյուջեն հաստատվում է յուրաքանչյուր երկու տարին մեկ՝ գլխավոր համաժողովի ժամանակ, եւ ձեւավորվում է անդամ-պետությունների անդամավճարներից: Անդամավճարի չափը տատանվում է այն նույն սկզբունքով, ինչ ՄԱԿ-ի անդամավճարը: ՅՈՒՆԵՍԿՕ-ի բյուջեն 2010-2011թթ.-ներին հաստատվել էր 653 մլրդ դոլար ծավալով: ԱՄՆ-ն ձեւավորել էր այդ բյուջեի 22 տոկոսը, Ճապոնիայի ներդրումը կազմել էր 12,5, Գերմանիայինը՝ 8, Մեծ Բրիտանիայինը՝ 6,6, Ֆրանսիայինը՝ 6,1 տոկոս:
