Հաջորդ տարվա պետական բյուջեում 101 միլիարդ դրամի լրացուցիչ եկամուտներ ապահովելու նպատակով կառավարությունը ԱԺ է ներկայացրել հարկային նոր փաթեթ:
Հարկային օրենքներում փոփոխություններ առաջարկելով՝ կառավարությունը նախատեսում է ներկայիս 7000 դրամ սոցվճարների փոխարեն գանձել 9000 դրամ: Ընդ որում, 100.000 դրամը գերազանցող աշխատավարձերի դեպքում սոցվճարների համար գանձվող գումարի արժեքն էլ կբարձրանա: Այսօր տեղի ունեցած ասուլիսում Հայրենական արտադրողների միության նախագահ Վազգեն Սաֆարյանը մտահոգություն հայտնեց, որ կառավարության այս որոշումը կարող է մեծացնել ստվերային տնտեսությունը. «Սա պրոգրեսիվ հարկատեսակ է՝ շատ ստացողը շատ հարկ պիտի մուծի, բայց արդյո՞ք մեր գործարարները պատրաստ են դրան»:
Հարկային նոր փոփոխություններում կառավարությունը առաջարկում է գինու, կոնյակի, գարեջրի , սպիրտի ակցիզահարկերն էլ հավասարեցնել դրսից ներմուծվող ապրանքների հարկերին: Պարոն Սաֆարյանի կարծիքով, այդ որոշումը չի խրախուսում տեղական արտադրողին եւ կարող է դառնալ ալկոհոլային խմիչքների շուկայում գնաճի նոր հնարավորությունների պատճառ: Հարկային նոր փաթեթը նախատեսել է նաեւ շքեղության հարկատեսակի ավելացում: Պարոն Սաֆարյանի խոսքերով, 3 տարվա թարմություն ունեցող մեքենաները, որոնք 200–ից ավելի բարձր ձիաուժ ունեն, ներմուծման դեպքում շարժիչի 1 ձիաուժի համար լրացուցիչ հարկատեսակներով պետք է հարկվեն: Եթե ԱԺ-ն հավանություն տա կառավարության առաջարկած այս փոփոխություններին, ապա հաջորդ տարվանից կավելանան նաեւ հաստատագրված վճարները, ինչն, ըստ պարոն Սաֆարյանի, անխուսափելիորեն կհանգեցնի բոլոր ապրանքների գնաճի: Բանախոսին մտահոգել է նաեւ արտահանվող մետաղական հումքի համար 10% -ի չափով նախատեսված մաքսատուրքերը, որոնք նախկինում չեն գանձվել. «Արտահանման ծավալների կեսից ավելին բաժին է ընկնում մետաղի հումքի արտահանմանը , հնարավոր է, որ հարկային այսպիսի գործառույթը նվազեցնի արտահանման ծավալները, իսկ արտահանման ոլորտում լուրջ խնդիրներ ունենք…Սա ոչ թե կփոքրացնի ստվերային տնտեսությունը, այլ նոր ստվեր կարող է առաջացնել ու ազդել փոքր ու միջին բիզնեսի վրա, նրանց արտադրական ծավալներն էլ կփոքրանան»: Պարոն Սաֆարյանի կարծիքով, ցանկացած հարկային խստացում առնվազն կես տարի առաջ պետք է արվի, որ տնտեսվարողները կարողանան համադրել իրենց տնտեսական գործառույթները հարկային նոր փոփոխություններին:
