«Նախընտրական շրջանում Հայաստանի բոլոր քաղաքական ուժերը փորձում են եւ դեռ կփորձեն իրենց մտերմիկ կեցվածքը ցուցադրել Ռուսաստանի նկատմամբ. դա արվում է թե ՀՀԿ-ի, թե ՀԱԿ-ի կողմից փոխադարձ այցելություններով եւ բոլոր այլ հնարավոր միջոցներով, քանի որ Ռուսաստանի հետ է կապված այս կամ այն քաղաքական ուժի հաջողությունը, չէ՞ որ Հայաստանի տնտեսությունը 50 տոկոսով կապված է Ռուսաստանի հետ»,- երեկ լրագրողների հետ հանդիպման ժամանակ ասել է ԼՂՀ նախկին արտգործնախարար Արման Մելիքյանը: Նրա խոսքով՝ «իրականությունն այն է, որ ՀՀ-ն եւ ՌԴ-ն սերտորեն փոխկապակցված են, եւ պետք է գտնվի այն նուրբ սահմանագիծը, որից այն կողմ չի կարելի անցնել ո՛չ հայերին, ո՛չ էլ ռուսներին»: ՌԴ-ն, Մելիքյանի մատուցմամբ, Հայաստանում փորձում է միաժամանակ գործակցել տարբեր քաղաքական ուժերի հետ, գուցե, խանդի մթնոլորտ ձեւավորելու համար՝ Ռուսաստանի բարյացակամությունը շահելու համար ստեղծելով ներքին մրցակցություն:
Նա նաեւ համոզմունք է հայտնել, որ Ռուսաստանը էապես կազդի ընտրությունների արդյունքի վրա՝ անգամ պարզապես կարծիք հայտնելով, այս կամ այն քաղաքական ուժի հետ մտերմիկ հանդիպում ունենալով. «Մենք տպավորվող ժողովուրդ ենք, հատկապես այդ կարգի ցուցադրական գործողություններից»,- ասաց Արման Մելիքյանը՝ հավելելով, որ «Հայաստանը պետք է կողմնորոշվի ոչ թե այն առումով՝ ում հետ չպետք է բարեկամություն անի, այլ թե՝ ում հետ ինչ չափով ու ինչ բովանդակությամբ բարեկամություն անի»:
